नागढुंगा–नौबिसे सुरुङमार्ग निर्माणमा गति : अब चौबिसै घन्टा काम हुने

काठमाडौं– नागढुंगा नौबिसे सुरुङमार्ग निर्माणको कामले गति लिने भएको छ । जापानी कम्पनी हाज्मा आन्दो कर्पोरेसनले तोकिएकै समयमा सुरुङ मार्गको काम सक्ने भन्दै बिहिबारबाट २४ संै घन्टा काम गर्ने तालिका बनाएर कामदार खटाएको हो ।

जसमा ८–८ घन्टाको दुईवटा सिफ्ट र ४/४ घन्टाको ओभरटाइम तोकिएको छ । यसरी अब दुई सिफ्टमा काम गर्दा सुरुङ मार्गको निर्माणले तिव्रता लिनेछ ।

अहिले धादिङको पोर्टलबाट सुरुङ खन्ने काम थालिएको छ । पानीको सिपेज व्यवस्थापन गर्न र अन्य प्राविधिक कारणले धादिङतिरबाट काम सुरु गरिएको आयोजनाले जनाएको छ ।

हाल एक सिफ्टमा काम गर्दा दैनिक १ मिटर सुरुङ खनिदै आएको थियो । अब रातीमा पनि काम हुने भएपछि दैनिक ३ मिटर सुरुङ खनिने छ । यसका साथै स्केप टनेललाई पनि सँगसँगै अघि बढाइएको छ । हालसम्म स्केप टनेल १८ मिटर खनिसकिएको छ ।

४४ महिनामा सक्नेगरी ठेक्का सम्झौता भएको यो सुरुङको १५ महिनाअघि प्रधानमन्त्री केपी शर्मा ओलीले शिल्यान्यास गरेका थिए ।

करिव २.७ किलोमिटर सुरुङमार्ग निर्माण स्थानीय विवाद, मुआब्जा, निर्माण सामग्री र कोरोना भाइरसका महामारीका कारण निर्माण सुरु हुन ढिलाई हुन पुगेको थियो ।