अधिकृत आयातकर्ता र वितरकले मात्र स्पेयर पार्ट्स ल्याउन पाउनुपर्ने नाडाको माग

काठमाडौं–नाडा अटोमोबाइल्स एसोसिएसन अफ नेपालले स्पेयर पार्ट्स वितरण गर्ने अधिकृत आयातकर्ता र वितरकले मात्र स्पेयर पार्ट्स ल्याउन पाउनुपर्ने व्यवस्था लागु गर्न सुझाव दिएको छ । आगामी आर्थिक वर्षको बजेटमा सुझाव पठाउँदै नाडाले अधिकृत आयातकर्ता र वितरकहरुले मात्र स्पेयर पार्ट्स आयात र वितरण गर्ने व्यवस्था लागु गर्न अर्थ मन्त्रालयलाई सुझाव दिएको हो ।

हाल जोकोहीले स्पेयर पार्ट्स आयात गर्दै आएकोमा नाडाले अब अधिकृत आयातकर्ताले मात्र ती सवारीसाधनको पार्टपूर्जा आयात गर्न पाउनुपर्ने व्यवस्था लागु गर्न माग गरेको छ ।

‘यसले वास्तविक स्पेयर पार्ट्समात्र आयात हुने कुरा सुनिश्चित गर्दै स्पेयर पार्ट्सको अबैध आयातलाई निरुत्साहित गरी सरकारी राजश्व बढाउन योगदान पुर्याउँछ’ नाडाले भनेको छ ।

साथै नाडाले स्पेयर पार्ट्स आयतमा लाग्दै आएको भन्सार महशुललाई घटाएर ५ प्रतिशतमा झार्नुपर्ने माग समेत राखेको छ । स्पेयर पार्ट्स आयात गर्दा हाल एचएस कोड अनुसार १५ देखि ३० प्रतिशतसम्म भन्सार महशुल लाग्ने गरेको छ ।