प्रवेशको नजरमा : नाडाको नयाँ नेतृत्वले गर्नु पर्ने आवश्यक २० कार्यहरु

नाडा अटोमोबाइल्स एसोसिएसन अफ नेपालको नयाँ नेतृत्व चयन हुँदैछ । देशभरका अटोमोबाइल व्यवसायीहरुका बीचमा हाल यस विषयमा बहस चलिरहेको छ । नयाँ नेतृत्वका लागि करण चौधरी र ध्रुब बहादुर थापाका बीचमा प्रतिस्पर्धा चल्ने छ ।

नाडाको आगामी नयाँ नेतृत्व जसले लिए पनि परम्परागत भन्दा केही नयाँ गरेर देखाउनु पर्ने अवस्था छ । नेपाली अटोमोबाइल क्षेत्रमा केही नयाँ चाहने र गर्ने नै हो भने निम्नानुसारका कार्य गर्नु आवश्यक छ ।

१. नेपालको भौगोलिक अवस्था अनुसार कस्ता खालका अटोमोबाइलको आवश्यकता छ भन्ने वारेमा अध्ययन अनुसन्धान गर्नुपर्छ ।

२. सरकारसँग मिलेर सवारी साधनका लागि गुणस्तरीय इन्धन (युरो स्ट्यान्डर्ड) को लागि कार्य गर्नुपर्छ ।

३. सवारी साधनले गर्ने प्रदूषण नियन्त्रणका लागि सरकारसँग मिलेर समानान्तर रुपमा कार्य गर्नु आवश्यक छ ।

४. नयाँ ड्राइभिङ लाइसेन्स तथा नवीकरणका लागि भइरहेको व्यवस्थालाई परिमार्जन गरी आवश्यक व्यवस्था गर्नुपर्छ ।

५. वार्षिक रुपमा सडक सुरक्षा र यसको वारेमा जनचेतना जगाउने खालका कार्यक्रम गर्नु आवश्यक छ ।
६. प्रदूषणबाट हुने समस्यालाई न्यूनीकरण गर्नका लागि हरित कर (ग्रीन ट्याक्स) लगाउने र वातावरणमैत्री विद्युतीय सवारीको प्रवद्र्धनका लागि आवश्यक कार्य गर्ने ।

७. सडक दुर्घटना पीडितहरुका लागि राष्ट्रिय तथा अन्तर्राष्ट्रिय गैरसरकारी निकायसँग मिलेर कार्य गर्ने र बढ्दो सडक दुर्घटनालाई न्यूनीकरण गर्ने कार्यमा लाग्ने ।

८. सडक र सवारी सम्बन्धी जानकारीमूलक सामग्री अध्यापनका लागि विश्वविद्यालयहरुसँग मिलेर इन्जिनियरिङ पाठ्यक्रम निर्माणका लागि लविइङ गर्ने ।

९. इलेक्ट्रिक भेइकल, ट्रली बस, मेट्रो रेल आदि सञ्चालन वारेमा अध्ययन गर्ने ।

१०. नाडा अटो शोलाई अन्तर्राष्ट्रिय स्तरको बनाउने ।

११. अटोमोबाइल व्यवसायमा देखिने समस्या र अप्ठ्यारापन समाधानका लागि व्यावसायिक प्राविधिक टिमको निर्माण गर्ने र आवश्यक सहकार्य गर्ने ।

१२. नाडाले आफै पनि ड्राइभिङ सेन्टर, भेइकल टेस्टिङ सेन्टर, रेसिङ ट्रयाक, मोडिफिकेसन, टेक्निकल ट्रेनिङ सेन्टर आदि नयाँ व्यवसायको सुरुवात गर्न सक्छ । यस्तै नयाँ व्यवसायको थालनी गर्ने ।

१३. प्रोफेसनल स्पिकरहरुलाई आमन्त्रण गरी अन्तर्राष्ट्रिय स्तरको अटोमोटिभ कन्फ्रेन्सको आयोजना गर्ने ।

१४. अटोमोबाइल सम्बद्ध अन्तर्राष्ट्रिय संगठनहरु एसएई इन्टरनेसनल, फिसिटा, आईमेक, आईर्याप, एफआईए आदिको सम्बन्धन लिने ।

१५. नाडाको सदस्यता लिने प्रक्रिया विस्तार गरी विद्यार्थी र इन्जिनियरिङ क्षेत्रका व्यक्तिहरुलाई पनि सदस्यता दिने ।

१६. विद्यार्थी वा अन्य कुनै अनुसन्धानकर्ताले बनाएका नयाँ इनोभेसनलाई समर्थन गर्ने र आवश्यक सहयोग गर्ने ।

१७. अन्तर्राष्ट्रिय स्तरका सडक र पूर्वाधार निर्माणका लागि सरकारसँग मिलेर कार्य गर्ने ।

१८. सवारी साधनको बिमा सम्बन्धी नीतमा सुधारका लागि आवश्यक कार्य गर्ने ।

१९. नेपालबाटै अन्तर्राष्ट्रिय ड्राइभिङ लाइसेन्स लिने प्रक्रियाका लागि आवश्यक कार्य गर्ने ।

२०. सवारी साधन आयात गर्दा लाग्ने करको वारेमा सरकारी नीति निर्माताहरुसँग आवश्यक छलफल गर्ने र आवश्यक सुधार गर्ने ।

(प्रवेश पौडेल हाल टोयोटा सर्भिस सेन्टरमा कार्यरत छन् ।)