असोज ६ देखी ९ गतेसम्म इभी एक्सपो आयोजना हुने

नाडा अटोमोवाइल एसोसिएसन अफ नेपालले पहिलोपटक इभी एक्सपो आयोजना गर्ने भएको छ । नाडाका अध्यक्ष धु्रव थापाको अध्यक्षतामा आज बसेको केन्द्रीय कार्य समितिको आठौ बैठकले पहिलो पटक नाडा इभि एक्सपो २०२२ आयोजना गर्ने निर्णय गरेको हो ।

एक्सपो असोज ६ देखि ९ गतेसम्म काठमाण्डौको भृकुटी मण्डपस्थित प्रदर्शनी हलमा हुनेछ । सरकारले कार, जीप र भ्यानको आयातमा लगाएको प्रतिबन्ध २०७९ को भाद्र १४ गतेसम्मको लागि विस्तार गरे पछि नाडाले यसअघि तय गरेको वृहत अटो शोलाई स्थगित गरेर इभि एक्सपो २०२२ गर्ने निर्णय गरेको हो ।

इभी एक्सपोमा सहभागी हुन इच्छुक कम्पनी एवं व्रान्डले भाद्र १ देखि ५ गतेसम्म स्टल बुकिङ्क गर्न सक्ने व्यवस्था मिलाइएको अटो एक्सपो समितिका सभापति अनुप बरालले जानकारी दिए । नाडाले सन् १९९८ देखि नाडा अटो एक्सपो आयोजना गर्दै आइरहेकोमा कोरोना महामारीका कारण अघिल्ला २ वटा शो आयोजना हुन सकेको थिएन ।

यसैगरी यसपटक इलेक्ट्रिक र कमर्सियल भेइकल वाहेक अन्य वाइक र प्यासेन्जर कारमा प्रतिवन्ध लम्विएपछि अन्तिम समयमा आएर घोषित एक्सपो स्थिगित गर्नुपरेको थियो ।