नाडा अध्यक्ष दुलाल भन्छन् – साधारण सभा समयमै हुन्छ, संस्थापन पक्ष कसैको पक्ष र विपक्षमा लाग्दैन

अटोमोबाइल व्यवसायीहरुको छाता संगठन नाडा अटोमोबाइल्स एसोसिएसन अफ नेपालमा नयाँ नेतृत्वका लागि रस्साकस्सी शुरु भएको छ । अध्यक्ष पदका लागि हालसम्म २ जना व्यवसायीले औपचारिक रुपमा दाबेदारी प्रस्तुत समेत गरिसकेका छन् ।

सुजुकी गाडीको नेपालका लागि आधिकारिक बितरक सिजी मोटोकर्पका कार्यकारी निर्देशक करण चौधरी र पोखराका व्यवसायी धुब्र थापाले आगामी नेतृत्वका लागि दाबेदारी प्रस्तुत गरेका हुन् । चौधरी हालको कार्यसमितिमा उपाध्यक्ष छन् भने थापा यसअघिको कार्यसमितिमा उपाध्यक्ष भैसकेका ब्यक्ति हुन् ।

अध्यक्ष पदका लागि दाबेदारी प्रस्तुत हुन थालेपछि विगतमा झै यसपाली पनि नेतृत्व चयन प्रतिस्पर्धात्मक बन्ने देखिएको छ । यसैमाझ अहिले व्यवसायीलाई नाडाको चुनावी माहोलले छोइसकेको छ । अध्यक्षमा २ जना आकांक्षी देखिएका कारण उनीहरुबीच छुट्टाछुट्टै गठबन्धन बन्ने देखिएको छ । गठबन्धनमा जो बलियो भयो उसैले चुनाव जित्ने विगतका अभ्यासहरुले देखाएका कारण यसपाली पनि बलियो गठबन्धनले नै नेतृत्व हात पार्ने निश्चित प्रायः बनेको हो ।

विगतको अभ्यासलाई हेर्ने हो भने गठबन्धनमा संस्थापन अर्थात हालको कार्यसमितिले जसलाई सहयोग गर्छ उसैले नेतृत्व हात पार्ने देखिँदै आएको छ । यसैमाझ नाडामा हालका अध्यक्ष कृष्णप्रसाद दुलाल यसपाली संस्थापन पक्षले कसैको पक्ष र बिपक्षमा वकालन नगर्ने बताउँछन् । उनी भन्छन, ‘अहिले दाबेदारी प्रस्तुत गरेका दुबै जना नाडाको कार्यसमितिमा लामो सयमदेखि लाग्दै आउनुभएका अनुभवी उम्मेदवार हुनुहन्छ । नेतृत्वका लागि उहाँहरु दुबैजना सक्षम समेत देखिनुहुन्छ । यस्तो परिस्थितिमा हामीले कसैको पक्ष र बिपक्षमा वकालत गर्नु उचित हुँदैन । यो अधिवेशनमा हाम्रो भूमिका तटस्थ रहन्छ ।’ यद्यपि अध्यक्ष लगायत अन्य पदाधिकारीमा समेत महत्वाकांक्षीहरु धेरै हुने हुँदा हालको कार्यसमितिमा रहेका पदाधिकारीहरु भने दुबै गठबन्धनमा बाँडिन सक्ने उनको भनाइ छ । कोरोना महामारीका बाबजुद आफू नेतृत्वको नाडाले प्रशस्तै कामहरु गरेको दुलालले दाबी गरे ।

‘मेरो नेतृत्वमा नाडाले ऐतिहासिक काम गरेको छ । कोरोना महामारीका कारण नाडा अटो शो जस्ता व्यावसायिक काम गर्न नसकिए पनि नीतिगत कुराहरुमा धेरै काम भएका छन् । बजेटमा हाम्रा मागहरु समेट्न सफल भएका छौ । नाडाको संगठन ७ वटै प्रदेशमा विस्तार गर्न सफल भएका छौ’ उनले भने । विषम परिस्थितिका बाबजुद नाडामा आफ्नो नेतृत्व सफल भएको उनको भनाइ छ ।

विगतमा केही अध्यक्षहरुले दोस्रो कार्यकालका लागि समेत दाबेदारी प्रस्तुत गर्ने गरेको प्रसंगमा उनले भने, ‘विगतमा जे जस्तो भएपनि म दोस्रो कार्यकालका लागि दाबेदारी प्रस्तुत गर्ने पक्षमा छैन । एउटै अध्यक्षले दुई कार्यकाल दोहो-याउने विषय नाडाको विधानमा नभएका कारण विधान विपरितको बाटोमा कसैले पनि हिड्नु हुँदैन भन्ने मेरो मान्यता हो । त्यसैले समयमै साधारणसभा र अधिवेशन सम्पन्न गरेर नयाँ नेतृत्वका लागि जिम्मेवारी सुम्पने मेरो योजना छ ।’ नेतृत्व चयनलाई सकेसम्म सर्वसम्मत गराउने र नभएको खण्डमा स्वस्थ प्रतिस्पर्धामार्फत नेतृत्व हस्तान्तरण गर्ने उनको भनाइ छ ।

नाडाको विधान अनुसार भदौ महिनाको अन्तिम सम्ममा साधारणसभा आयोजना गरिसक्नुपर्ने प्रावधान छ । केही कारणले सो समयमा आयोजना हुन नसके ढिलोमा पुस महिनाभित्र अनिवार्य साधारण सभा सम्पन्न गरिसक्नुपर्ने हुन्छ ।