स्काइवेल सहित यी ४ ब्राण्डले पाए नाडा अटो शो–२०२४ को प्रिमियम स्टल

काठमाडौं– नाडा अटोमोबाइल एसोसिएसन अफ नेपालले अटो शो–२०२४ मा सहभागी हुने ब्राण्डलाई स्टल बाँडफाँड गरेको छ । लक्कि ड्र मार्फत गरिएको उक्त बाँडफाँडमा मुख्य हलको ११ वटा स्टल विभिन्न कार ब्राण्डले पाएका छन् ।

हलको प्रवेशद्धार अगाडी रहने ४ वटा स्टलमा क्रमशः टाटा, हुन्डाई नेटा र स्काइवेलले आफ्नो गाडी शोकेस गर्न पाउने भएका छन् । मुख्य हलको प्रवेश द्धार अगाडी रहने र दर्शकको अत्याधिक चाप हुने कारण यी स्टललाई प्रिमियम मान्ने गरिन्छ ।

यसैगरी, हल भित्रको बाँकी स्टल जिएसी, सेरेस, नामी, लिप मोटर, राडार, किया र सिट्रोनले पाएका छन् भने दिपाल, ओमोडा, बीवाईडी र सुजुकी लगायत ब्राण्डले बाहिर डोमभित्र स्टल बनाउनु पर्नेछ । अटो शोमा टु–ह्विलर र स्पेयर पार्ट्स एबं अन्य कम्पोनेन्ट्सका लागी छुट्टै पेभिलियन रहने व्यवस्था छ ।

नाडा अटोमोबाइल्स एसोसियसन अफ नेपालले आगामी भदौ ११ देखी १७ गतेसम्म राजधानीको भृकुटीमण्डमा अटो शो–२०२४ आयोजना गर्दै छ । मेलामा यसपटक इलेक्ट्रिक कार, भ्यान तथा माइक्रोवस र इलेक्ट्रिक टु–ह्विलरले सबैभन्दा वढि स्टल लिएका छन् ।।