नाडाको साधारण सभा रोक्न जिल्ला प्रशासन कार्यलयको पत्रचार

काठमाडौं–नाडा आटोमोवाइल एसोसिएसन नेपाल (नाडा)ले भोली (पुष ९ गते)का लागि तय गरेको साधारण सभा फेरी रोकिएको छ ।

जिल्ला प्रशासन कार्यालय काठमाडौंले नाडालाई महासंघमा लैजाने प्रस्तावसहित पुस ९ गते बोलाइएको साधारण सभा विधान बमोजिम नभएको भन्दै तत्काल रोक्न पत्रचार गरेको हो ।

साधारण सभाको प्रस्तावनै नाडालाई महासंघमा लैजाने एजेन्डा मात्र रहेकोले सो प्रस्ताव कानुन सम्मत नभएको हुँदा सो सम्बन्धि कार्य नगर्नु र नगराउनु भन्ने आदेशसहितको पत्र जिल्ला प्रशासन कार्यलयले पठाएको हो ।

कार्यसमितिभित्र उत्पन्न विवादलाई समधान नगरी एकतर्फि रुपमा हालका पदाधिकारीले नाडालाई महासंघमा लगेर आफ्नो पद लम्ब्याउन खोजेको र विधान संशोधनमा ध्यान नदिएको आरोप लगाउँदै केही कार्यसमिति सदस्य पदाधिकारीसँग रुष्ट हुँदै आएका छन् । उनीहरुले प्रशासनमा उजुरी हालेपछि दोस्रो पटक साधारण सभा रोकिएको हो।