नाडा अधिवेशन आगामी भाद्र २५ गते हुने

काठमाडौं – नाडा अटोमोबाइल्स एसोसिएसन अफ नेपालको ४४औं वार्षिक साधारण सभा तथा अधिवेशन आगामी भाद्र २५ गते हुने तय भएको छ । आज बसेको नाडा कार्यसमिति बैठकले सो मिति तय गरेको नाडा अध्यक्ष कृष्णप्रसाद दुलालले बताए ।

नाडाको विधान अनुसार १ जना अध्यक्ष र १७ जना साधारण सदस्यको निर्वाचन त्यही दिन हुनेछ । बाँकी मनोनित र संस्थागत सदस्य तथा सबै पदाधिकारी गरी २९ जनाको कार्यसमिति हुनेछ । संस्थाको पदाधिकारीहरु भने कार्यसमितिबाटै चयन हुने व्यवस्था रहेको छ ।

नाडाको २ वर्षे कार्यकालका लागि हुने निर्वाचनमा हालका उपाध्यक्ष करण चौधरी र पूर्व उपाध्यक्ष ध्र्रुब थापाले अध्यक्ष पदमा उम्मेदवार बन्ने घोषणा गरेका छन् ।

हाल नाडामा ३ हजार ३६५ सदस्य रहेको बताइएको छ । ती सबै सदस्यहरुमा मताधिकार रहने छ ।