भारतमा यो वर्ष मोटो जीपी रेस नहुने, यस्तो छ कारण

विश्व प्रख्यात बाइक रेस मोटो जिपी यो वर्ष भारतमा नहुने भएको छ । यस वर्षका लागि स्थगित गरिएको उक्त रेस २०२५ को मार्चमा आयोजना हुने आयोजकको भनाई छ । आयोजक एफआईएम, आईआरटिएस र डोर्ना स्पोर्टसले २०२४ मा इन्डियन ग्राण्ड प्रिक्स नहुने घोषणा गरेका हुन् ।

आयोजकका अनुसार यो वर्ष रेस आयोजना नगर्नुको मुख्य कारण चर्को गर्मी हो । गत वर्ष पनि सेप्टेम्बर महिनामा बुद्ध इन्टरनेशनल सर्किटको ट्रयाकमा सहभागी हुन आएका रेसले चर्को गर्मी भएको गुनासो गरेका थिए । अत्याधिक गर्मीका कारण कतिपय रेसरको अवस्था बिग्रिएको थियो । यस वर्ष पनि भारतमा गर्मीले आफ्नो प्रकोप देखाउन थालेको छ ।

गत वर्ष सेप्टेम्बर महिनामा ग्रेटर नोएडाको बुद्ध इन्टरनेशनल सर्किटमा विश्वको सबैभन्दा प्रसिद्ध रेसिङ च्याम्पियनसिप (मोटोजीपी भारत) सुरु भएको थियो । तीन दिनसम्म चलेको मोटोजीपीको फाइनल रेसमा कुल ११ टोली र २२ राइडरले भाग लिएका थिए । भारतको पहिलो मोटोजीपीको फाइनल दौडमा इटालियन रेसर मार्को बेजेचीले सबैभन्दा छोटो समयमा पोल पोजिसन कब्जा गर्दै इन्डियन ग्राण्ड प्रिक्स जितेका थिए ।