यस्तो हुन सक्छ १०० किलोवाट बढीका इलेक्ट्रिक कारको नयाँ मूल्य : एउटै कारको ७० लाख सम्म बढ्ने

आगामी आर्थिक वर्षको बजेटमा सरकारले १ सय किलोवाट भन्दा बढी क्षमताको मोटर जडित इलेक्ट्रिक कारमा भारी मात्राले कर बढाएको छ । हाल बजारमा उपलब्ध एकाध बाहेक सबैजसो यस्ता कार १ सय किलोवाट माथिमात्र उपलब्ध भएका कारण धेरैजसो कारको मूल्य फराकिलो अन्तरले वृद्धि हुने देखिन्छ ।

यसअघि जम्मा १५ प्रतिशत मात्र भन्सार शुल्क लाग्दै आइरहेको यस्ता इलेक्ट्रिक कारमा सरकारले एकैपटक १०१ देखि २०० किलोवाटसम्ममा ३० प्रतिशत अन्तःशुल्क र १५ प्रतिशत भन्सार बढाए पछि यी कारको मूल्य ३० लाख माथिसम्म बढ्ने देखिएको हो ।

बजेटमा सरकारले कर थप गरेपछि नेपाल आउने तयारीमा रहेका केही कारको भविष्य समेत अन्योलमा परेको छ । नेपाल आउने अन्तिम तयारीमा रहेका बीवाईडी एटो३ र किया ईभी६ को नेपाल आगमन सम्वभतः यही कारणले रोकिन पनि सक्छ । यसअघि ६० लाख हाराहारीमा लन्च गर्ने भनिएको एटो३ को मूल्य ८५ लाख माथि र १ करोड २० लाख हाराहारी अनुमान गरिएको ईभी६ को मूल्य डेढ करोड माथि पुग्ने देखिन्छ ।

बजारमा अहिले हुन्डाईसँग कोना र आयोनिक५ गरी कुल २ मोडलका इलेक्ट्रिक कार उपलब्ध छन् । जसमध्ये कोनामा १ सय किलोवाट क्षमताको मोटर जडान भएको हुँदा यसलाई थप गरिएको करले कुनै असर गर्ने देखिँदैन । अर्को प्रिमियम क्रसओभर अयोनिक५ मा भने १२५ किलोवाट क्षमताको मोटर जडान गरिएको छ । यो कारलाई आधिकारिक वितरक कम्पनी लक्ष्मी इन्टरकन्टिनेन्टल प्रालिले ८१ लाख हाराहारीमा बिक्री गर्दै आइरहेकोमा भन्सार र अन्तःशुल्क गरी ४५ प्रतिशत वृद्धि हुँदा नयाँ मूल्य १ करोडमाथि पर्ने सहजै अनुमान लगाउन सकिन्छ ।

यसैगरी पारामाउन्ट मोटर्सले बिक्री गर्दै आइरहेको एमजी जेडएस ईभीको स्ट्यान्डर्ड भेरिएन्टमा १३० र लङ रेन्ज भेरिएन्टमा ११५ किलोवाट क्षमताको मोटर जडान गरिएको छ । यो ईभीमा पनि ३० प्रतिशत अन्तःशुल्क र १५ प्रतिशत भन्सार शुल्क बढ्ने छ । यसअघि ५२ लाख र ६० लाख रुपैयाँमा बिक्री गर्ने भन्दै वुकिङ लिएकोमा अव मूल्य बढेर ७० र ८० लाख माथि पर्ने आँकलन गर्न सकिन्छ ।

किया गाडीको आधिकारिक वितरक कन्टिनेन्टल ट्रेडिङले बिक्री गर्दै आइरहेको निरो ईभीमा १५० किलोवाट क्षमताको मोटर जडान गरिएको छ । यो इलेक्ट्रिक कारलाई कम्पनीले ७० लाख रुपैयाँमा बिक्री गर्दै आइरहेको थियो । यसमा पनि ३० प्रतिशत अन्तःशुल्क र १५ प्रतिशत भन्सार थप हुँदा २५ लाख हराहारी मूल्य बढ्ने देखिन्छ ।

जापनिज अटो निर्माता निसान मोटर्सले निर्माण गरेको लिफ ईभीमा ११० किलोवाट क्षमता र ग्रेटवाल मोटर्सको ओरा गुड क्याटमा १०५ किलोवाट क्षमताको मोटर जडान गरिएको छ । निसानको नेपालका लागि आधिकारि वितरक पायोनियर मोटोकर्पले यसअघि ६० लाख रुपैयाँमा बिक्री गर्दै आइरहेको लिफको मूल्य २० लाख हाराहारी बढेर ८० लाख आसपास पुग्ने देखिन्छ ।

उता ग्रेटवाल मोटर्सको आधिकारिक विरतक भीजी इम्पेक्सले यसअघि ४८ लाख रुपैयाँमा बिक्री गर्दै आइरहेको ओरा गुड क्याटमा १५ लाख हाराहारी मूल्य बढ्ने अनुमान गर्न सकिन्छ ।

नेपाली बजारमा उपलब्ध इलेक्ट्रिक कारमध्ये सबैभन्दा महंगो टेस्ला वाई मोडलमा २९१ किलोवाट क्षमताको मोटर जडान गरिएको छ । यो इलेक्ट्रिक कारमा ४५ प्रतिशत अन्तःशुल्क र १३ प्रतिशत भन्सार थप गरिएका कारण यो कारमा ७० लाखभन्दा बढीले मूल्य वृद्धि हुने देखिन्छ । टेस्लाकै मोडल३ मा भने १५८ किलोवाटको मोटर जडान भएका कारण यसमा ५० लाख हाराहारी बढ्ने अनुमान लगाउन सकिन्छ । यसअघि टेस्ला वाइको मूल्य १ करोड ९५ लाख रुपैयाँसम्म र मोडल३ को १ करोड ६५ लाख रुपैयाँसम्म रहेको थियो ।