अटोमोबाइल क्षेत्रमा क्रियाशील मेघराज पौडेल एमालेको खेलकुद विभाग सचिवमा मनोनित

काठमाडौं - एमालेको युवा तथा खेलकुद विभागको सचिवमा मेघराज पौडेल मनोनित भएका छन् । एमालेको सचिवालय बैठकले पौडेललाई केन्द्रिय युवा तथा खेलकुद विभागको सचिवको जिम्मेवारी दिएको हो । 

लिलबहादुर थापा प्रमुख रहेको विभागमा यसअघिनै सदस्यहरु मनोनित भएका थिए । बिहीबारमात्र विभिन्न विभागको सचिव टुङ्गो लगाउने क्रममा खेलकुद विभागको सचिवमा पौडेललाई मनोनित गरिएको हो । 

नेपाल क्लाइमबिङ एसोसिएसनका महासचिव रहेका पौडेल एमालेको खेलकुद राजनीतिमा क्रियाशिल छन् । उनी यसअघि एमालेको नेपाल खेलकुद महासंघको केन्द्रिय महासचिव थिए । 

खेलकुद महासंघमा लामो समय राजनीति गरेका पौडेललाई एमालेले विभाग सचिवको जिम्मेवारी दिएको हो । नेपालमा मोटर स्पोर्टससँगै साहसिक तथा पर्वतीय खेलमा पौडेलले काम गरेका छन् । उनी पर्वतीय खेलकुद महासंघका पूर्व कोषाध्यक्ष समेत हुन् । उनले नेपाल अटोमोबाइल्स एसोसिएसन (नासा नेपाल) मा समेत उपाध्यक्ष र अन्य विभिन्न पदमा रहेर लामो समय काम गरिसकेका छन् । उनी नेपाली बजारमा रोयल इन्फिल्ड बाइकको प्रबर्द्धक समेत मानिन्छन् ।

एमालेको खेलकुद नीति, नियम निमार्ण गर्ने निकाय खेलकुद विभागले पार्टी र सरकारमा खेलकुदको एजेण्डालाई लबिङ र स्थापित गर्ने काम गर्छ । 

विभाग सचिवमा मनोनित पौडेलले एमालेको खेलकुद नीतिलाई राज्यको आधारभुत खेलकुदको विकाससँग जोडेर काम गरिने बताए ।