१०० बढि स्थानमा एमएडब्लु बृद्धिको डिसी फास्ट चार्जर, थप विस्तार हुँदै

काठमाडौं– ईभी व्यापारमा निकै नै आक्रमक तवरले प्रस्तुत हुँदै आएको एमएडब्लु वृद्धिले नेपालमा १०० भन्दा बढि ईभी चार्जिङ स्टेशन सञ्चालनमा ल्याएको छ । चार्जिङ स्टेशनको संख्या १०० नाघेको अवसर पारेर कम्पनीले हालै एक कार्यक्रम समेत आयोजना गर्यो ।

उक्त कार्यक्रममा सीसीएस२ टाइप डिसी फास्ट चार्जर नेटवर्कको संख्या १०० नाघेको घोषणा गरिएको हो । काठमाडौं, पोखरा, विराटनगर र चितवन जस्ता ठूला सहरदेखी मुस्ताङ, डोटी, सुर्खेत, टीकापुर र डडेलधुरा जस्ता बिकट क्षेत्रहरुमा समेत एमएडब्लु वृद्धिले ईभी चालकहरूलाई यात्राको आनन्द लिने कुरा सुनिश्चित गरेको छ । यी नेटवर्कमा ४० किलोवाट (१गन) र ६० किलोवाट (२गन) दुवै चार्जर जडान गरिएको छ ।

कार्यक्रममा आफ्नो विचार ब्यक्त गर्दै एमएडब्लु वृद्धि कमर्सियलका सीईओ तुषार गुप्ताले भने, ‘यो केवल नम्बरमात्र नभएर यसले नेपालको हरित भविष्यप्रतिको हाम्रो प्रतिबद्धतालााई पुरा गरेको छ । निरन्तर बढ्दो नेटवर्कद्वारा हामी नेपालीहरूलाई विश्वासका साथ विद्युतीय गतिशीलतामा जान सक्षम बनाउँछौं, र हामी भर्खरै सुरु गर्दैछौ ।’

एमएडब्लु बृद्धि अन्तर्गत हाल दिपाल, नामी, सेरेस, फोटोन र सोकोन लगायत ब्रान्डका ईभी बिक्री भइरहेका छन् । यी सबै ब्रान्डले नेपाली बजारमा निकै राम्रो उपस्थिती जनाउँदै गएको छ ।