जनवरीदेखी मूल्य वढाउँदै मारुती सुजुकी, उत्पादन लागतको बृद्धि प्रमुख कारण

भारतको सवैभन्दा ठूलो प्यासेन्जर कार उत्पादक मारुती सुजुकीले जनवरीमा मूल्य बढाउने तयारी गरेको छ । कम्पनीका अनुसार विश्वव्यापी महंगीका कारण उत्पादन लागत वढेकाले मूल्य बृद्धि गर्न लागिएको हो । सरकारले ल्याएको नयाँ नितीका कारण पनि मूल्य बृद्धि गर्नुपरेको उसको भनाई छ ।

नेक्सा र एरेना मोडलका सवै भेरियन्टमा मूल्य बृद्धि हुने भएपनि कति रकमले बृद्धि हुने भन्ने विषयमा कम्पनीले कुनै जानकारी वाहिर ल्याएको छैन । मारुती सुजुकीले यो वर्ष पटकपटक गरी औषतमा ८.८ प्रतिशतसम्मले मूल्य बृद्धि गरिसकेको छ ।

भारतमा यसअघि टाटा मोटर्सले आफ्ना अधिकांश मोडलमा मूल्य बृद्धि गरिसकेको छ भने अन्य ब्राण्डहरु हुन्डाई, महिन्द्रा, टोयोटा, निशान, रेनो, फक्वागन र स्कोडा लगायतले पनि बढाउने तयारी गरिरहेका छन् ।

भारतमा मूल्य बृद्धि भएपछि यसको सिधा असर नेपाली बजारमा समेत पर्नेछ । भारतमा जस्तै नेपालमा पनि सुजुकी सवैभन्दा बढी संख्यामा बिक्री हुने प्यासेन्जर कार व्राण्ड हो । आयत प्रतिवन्धका कारण विगत ९ महिना यता सुजुकीका कार नेपाल आउन सकिरहेका छैनन् ।

उसले यो वर्ष भारतमा नयाँ व्रेजा, नयाँ अल्टो, ग्राण्ड भिटरा, वलेनो फेसलिफ्ट सहित आधादर्जन बढी मोडललाई नयाँ अवतारमा उतारेको छ । आयत खुल्ला भएपछि यी नयाँ गाडी विस्तारै नेपाल आउनेछन् ।