मारुती सुजुकी नयाँ ब्रेजाको पहिलो टिजर बाहिरियो : जुन ३० को लन्च पहिले खुल्यो बुकिङ

मारुती सुजुकीले भारतीय बजारमा आगामी जुन ३० मा लन्च गर्ने तयारी गरिरहेको नयाँ ब्रेजाको पहिलो टिजर सार्वजनिक भएको छ । यसका लागि बुकिङ समेत खुला भएको कम्पनीले बताएको छ ।

कम्पनीले सन् २०१६ देखि बजारमा उपलब्ध गराएको भिटारा ब्रेजामा भएको भिटारा शब्द अब हट्ने छ र यसको नाम ब्रेजा मात्र रहने छ । टिजर अनुसार यसको अघिल्लो भागमा फ्रेस स्टाइलिङ हुनेछ भने एंगुलर हेडल्याम्प डिजाइन र स्टाइलिस डे टाइम रनिङ लाइट हुनेछ । यो पहिलेकै जस्तो प्लेटफर्ममा उपलब्ध हुनेछ भने अल न्यु बडी प्यानल र इन्टेरियर हुनेछ ।

यसमा सनरुफ हुनेछ भने ६–स्पिड अटोमेटिक गियरबक्स हुनेछ । नयाँ मारुती सुजुकी ब्रेजामा नयाँ डिजाइन गरिएको हेडलाइट क्लस्टर र एलईडी डीआरएलसहित २ वटा ब्ल्याक ग्रिल हुनेछन् । बम्परमा नयाँ फगलाइट हाउजिङ र सिल्भर स्किड प्लेट समावेश गरिएको छ ।

कारको साइड पार्टमा अलोय ह्विल दिइएको छ भने ह्विल आर्च चौडा राखिएको छ । यसमा पुरानो मोडलको तुलनामा अलिकति फराकिलो क्ल्याडिङ छ । साथै यसमा ठूलो क्वार्टर ग्लास, ठूलो रुफ रेल र शार्क फिन एन्टेना दिइएको छ । कम्पनीले यसलाई मोनो टोन र ड्युअल टोन दुवै अवतारमा ल्याउन लागेको छ । यसको बम्पर परिवर्तन गरी सिल्भर स्किड प्लेट दिइनेछ ।

नयाँ ब्रेजामा पहिले भन्दा राम्रो ड्यासबोर्ड हुनेछ । यसमा ठूलो ९ इन्चको टचस्क्रिन इन्फोटेनमेन्ट सिस्टम, आधुनिक हेड–अप डिस्प्ले र फ्ल्याट बटम स्टेयरिङ, ३६० डिग्री क्यामेरा, अटोमेटिक क्लाइमेट कन्ट्रोल, १२ भोल्टको सकेट र पुस स्टार्ट/स्टप बटन जस्ता फिचर रहेको छ । मारुती सुजुकीले हालसालै आफ्ना धेरै मोडललाई ६ एयरब्याग र ४ एयरब्यागमा अपडेट गरेको छ ।

कम्पनीले यसमा हालको १.५ लिटर पेट्रोल इन्जिन दिनेछ, जसले १०३ बीएचपी पावर र १३८ एनएमको टर्क उत्पन्न गर्छ । यसको इन्जिनमा ५ स्पिड म्यानुअल र ४ स्पिड टर्क कन्भर्टर अटोमेटिक गियरबक्स जोडिएको छ । यसमा ६ स्पिड अटोमेटिक गियरबक्सको विकल्प पनि रहेको छ ।

आगामी दिनमा यो गाडीले बजारमा उपलब्ध हुन्डाई भेन्यु, किया सोनेट, टाटा नेक्सन, निसान म्याग्नाइट र रेनो काइगरसँग प्रतिस्पर्धा गर्नेछ ।