सुजुकीले सार्वजनिक ग-यो पहिलो प्रोडक्सन भर्सन ईभी ई–भिटारा, नेपालमा प्रतीक्षा

सुजुकीले इटालीको मिलानमा शुरु भएको मोटर शो ईआईसीएमए २०२४ मा आफ्नो पहिलो इलेक्ट्रिक कार विश्व बजारका लागि सार्वजनिक गरेको छ । यो सुजुकीले पहिले देखि नै ईभीएक्स कन्सेप्ट नाम दिएको इलेक्ट्रिक कारको प्रोडक्सन भर्सन हो । पहिलो पटक भारतको अटो एक्सपो २०२३ मा सार्वजनिक गरिएको सो कन्सेप्टको नाम अब ई–भिटारा राखिएको छ ।

सो कार भारतमा आगामी जनवरीमा सम्पन्न हुने भारत मोबिलिटी शो २०२५ मा प्रदर्शन गरिने छ । यसको उत्पादन २०२५ को फेब्रुअरी देखि सुजुकी मोटर गुजरातको प्लान्टमा शुरु हुनेछ । त्यसपछि मार्च महिना देखि युरोप, जापान र भारत लगायतका देशमा बिक्रीका लागि उपलब्ध हुनेछ । नेपालमा पनि त्यसपछि आउन सक्ने सम्भावना हुन्छ ।

ई–भिटाराको लम्बाई, चौडाई र उचाई क्रमशः ४२७५, १८०० र १६३५ एमएम छ । यसको ह्विलबेस २७०० एमएम र ग्राउन्ड क्लियरेन्स १८० एमएम छ । ५ जना व्यक्ति बस्न मिल्ने सो गाडीमा ४९ र ६१ किलोवाट आवरको ब्याट्री अप्सन हुनेछ ।

परमानेन्ट सिंक्रोनस इलेक्ट्रिक मोटर रहेको सो गाडी टु ह्विल र फोर ह्विल ड्राइभ अप्सनमा उपलब्ध हुनेछ । टु ह्विल ड्राइभमा ४९ किलोवाट आवरको ब्याट्रीले १४२ एचपी र ६१ किलोवाट आवरको ब्याट्रीले १७२ एचपी तथा फोर ह्विल ड्राइभमा ६१ किलोवाट आवरको ब्याट्रीले १८१ एचपी पावर दिन्छ । टु ह्विल र फोर ह्विलमा यसको टर्क क्रमशः १८९ एनएम र ३०० एनएम हुनेछ ।

यसमा भएको ब्याट्री चीनको प्रसिद्ध ईभी निर्माता कम्पनी बीवाईडीले विकास गरेको लिथियम आइरन फस्फेट अर्थात एलएफपी ब्लेड ब्याट्री हो । सुजुकीले पुरै ब्याट्री प्याक नै बीवाईडीबाट आयात गरेको बताइएको छ ।

सुजुकीले सो ईभीले दिने रेन्जको वारेमा आधिकारिक जानकारी सार्वजनिक गरेको छैन । तर पहिले नै कम्पनीले ६१ किलोवाट आवर क्षमताको ब्याट्री प्याकले ग्लोबल टेस्टमा करिव ५०० किलोमिटर रेन्ज दिने बताएको थियो । यसका आधारमा यस्तै रेन्ज हुने अपेक्षा गरिएको छ ।

सुजुकी ई–भिटाराको फोकस एड्भान्स्ड टेक्नोलोजी र पावर दिने कार्यमा हुने कम्पनीको भनाइ छ । यसमा अलग्रिप–ई नामक इलेक्ट्रिक फोर ह्विल ड्राइभ सिस्टम हुनेछ, जसले अफरोड क्षमता प्रदान गर्नेछ । यसले सुजुकीको ईभीलाई अन्य मास मार्केट ईभी सेगमेन्टका प्रतिस्पर्धी मोडलसँग फरक देखाउन सहयोग गर्नेछ ।

सुजुकी ई–भिटारा यसको कन्सेप्ट मोडलसँग धेरै मिल्दोजुल्दो छ । यसको लुक, डिजाइन र साइज समेत ईभीएक्स कन्सेप्ट जस्तै छ । यद्यपि केही सार्प एंगल्स भने कम गरिएको छ । यसको फ्रन्ट र रियरमा ट्राई–स्ल्यास एलईडी डे टाइम रनिङ लाइट, अघिल्लो किनारामा चार्जिङ पोर्ट र पछिल्लो ह्विल आर्चमा कर्भ दिइएको छ । यसमा रियर डोर ह्यान्डललाई सी–पिलर सम्म लगिएको छ, जुन पुरानो स्विफ्ट जस्तै छ ।

ई–भिटाराको क्याबिनमा ड्युअल स्क्रिनका साथ नयाँ अपरेटिङ सिस्टम वा युजर इन्टरफेस दिइएको छ । यसमा टचस्क्रिन सुविधा मात्र नभई यसमा हुने डिजिटल डायल धेरै इन्फोर्मेटिभ हुने बताइएको छ । पछिल्लो भागमा स्प्लिट फोल्डिङ सिट, एड्जस्टेबल हेडरेस्ट र सबै यात्रीका लागि थ्री–पोइन्ट सिटबेल्ट र आइसोफिक्स चाइल्ड सिट माउन्ट लगायतका सुविधा उपलब्ध हुनेछ ।

सो गाडीमा अटो होल्डका साथ इलेक्ट्रोनिक पार्किङ ब्रेक, अल ह्विल ड्राइभ भर्सनका लागि ‘ट्रेल’ सहित ड्राइभ मोड, हिल डिसेन्ट कन्ट्रोल, सिंगल जोन अटो क्लाइमेट कन्ट्रोल, वायरलेस फोन चार्जर, साइड र कर्टेन एयरब्याग, हिटेड मिरर र एडास जस्ता सेफ्टी फिचर रहेका छन् ।

बजारमा उपलब्ध भए पश्चात सुजुकी ई–भिटाराले टाटा कर्भ ईभी, महिन्द्रा बीई ०५ र हुन्डाई क्रेटा ईभी लगायतका ईभीसँग प्रतिस्पर्धा गर्नेछ ।

सुजुकीको ईभी नभएका कारण नेपाली बजारमा समेत यो ईभीको निकै नै प्रतीक्षा हुनेछ । नेपाली बजारमा उपलब्ध भए पश्चात यो नेपाली ईभी बजारको लागि अर्को बलियो प्रतिस्पर्धी हुनेछ ।