क्र्यास टेष्ट रेटिङको विषयलाई लिएर मारुती अध्यक्ष भार्गवले दिए यस्तो प्रतिक्रिया

मारुती सुजुकीका अध्यक्ष आरसी भार्गवले ग्लोवल एनक्यापले गर्ने क्र्यास टेष्ट रेटिङको विश्वसनियतामाथी प्रश्न उठाएका छन् । क्र्यास टेष्ट सेफ्टि कम्पोनेन्ट उत्पादकहरुको फन्डिङमा चलिरहेको समेत उनको आरोप छ । यसप्रकारको रेटिङमा अल्झिएर वस्नुभन्दा सडकको अबस्था सुधार गरेर दुर्घटना कम गर्नतर्फ लाग्नुपर्ने उनको सुझाव छ ।

मिडियासंगको कुराकानीमा उनले भनेका छन्, ‘भारतको जस्तो रोड कन्डिसनमा ग्लोवल एनक्यापले दिने रेटिङको कुनै अर्थ छैन । यो विशुद्ध एयर व्याग जस्ता सेफ्टि कम्पोनेन्ट उत्पादकहरुले चलाएको फन्डामात्र हो ।’ सन् २०१९ देखी गरिँदै आएको यस्तो टेष्ट यूरोपियन स्ट्यान्डर्डको भएका कारण भारतीय स्ट्यान्डर्डसंग मेल नखाने उनको भनाई छ ।

ग्लोवल एनक्यापले हालै आयोजना गरेको क्र्यास टेष्टमा मारुती सुजुकीका तीनवटै लोकप्रिय मोडल एसप्रेसो, स्विफ्ट र इग्निसले १ स्टार रेटिङ पाएपछि भार्गवको यस्तो प्रतिक्रिया आएको हो । यसअघिका क्र्यास टेष्टमा समेत मारुती सुजुकीका मोडलहरुले राम्रो रेटिङ पाउन सकेका थिएनन् ।

भारतका अन्य दुई व्रान्ड महिन्द्रा र टाटाले ५ स्टार रेटिङ पाउने गरी गाडीहरु उत्पादन गरिरहेको अबस्थामा मारुती सुजुकीमाथी पनि तत्कालै सेफ्टि रेटिङमा सुधार गर्नुपर्ने दवाव सिर्जना भएको छ । भारतमा उत्पादन भएका कुनै पनि मारुती मोडलले हालसम्म ५ स्टार रेटिङ प्राप्त गर्न सकेका छैनन् ।