मारुतीले थप्यो इको भ्यानमा एयर ब्याग, अब डुअल एयर ब्याग सहित आउने

मारुतीले आफ्नो लोकप्रिय भ्यान इकोमा सेफ्टि फिचर्स थप गरेको छ । यसअघि ड्राइभर एयर ब्याग मात्र उपलब्ध गराउँदै आएको कम्पनीले प्यासेन्जर एयर ब्याग समेत थप गरी डुअल एयर ब्याग उपलब्ध गराएको हो । एयरब्याग थप भएसंगै यो भ्यान थप महंगो समेत भएको छ । पहिलेको तुलनमा यसको मूल्य ८ हजार भारतिय रुपैँयाले महंगो हुने भएको हो ।

मारुती सुजुकीले सन् २०१९ मा पहिलोपटक इको भ्यानमा ड्राइभर एयर ब्याग सहित रियर पार्किङ सेन्सर र एबिएस दिएको थियो । आगामी महिना अर्थात सन् २०२२ को जनवारी महिनादेखी सबै प्रकारका प्यासेन्जर कारमा डुअल एयरब्याग अनिबार्य लागु गरिनुपर्ने मिति नजिकिएसंगै मारुतीले इको भ्यानमा यो फिचर्स थप गर्नु परेको हो । यो सेग्मेन्टमा एकलौटी बजार लिन सफल यो भ्यान नेपाली बजारमा समेत निकै लोकप्रिय मानिन्छ । नेपाली बजारमा यसको मूल्य १४ लाख ९९ हजारदेखी २६ लाख २९ हजार रुपैयाँसम्म निर्धारण गरिएको छ ।

इकोमा १.२ लिटर क्षमताको जी १२ पेट्रोल इन्जिन जडान गरिएको छ । जसको अधिकतम पावर ७३ एचपी र टर्क ९८ एनएम रहेको छ । यो कार्गो र प्यासेन्जर दुबै सेग्मेन्टमा उपलब्ध रहँदै आएको छ ।