महिन्द्राले भारतमा सार्बजनिक गर्यो एक्सयुभी ७०० को मूल्य, नेपाल आउँदा १ करोड माथीसम्म पर्न सक्ने

महिन्द्राले आफ्नो हालसम्मकै प्रिमियम र महंगो एसयुभी एक्सयुभी ७०० को मूल्य आज सार्बजनिक गरेको छ । उसले एमएक्स र एएक्स सिरिजमा कुल २० वटा भेरियन्टको मूल्य सार्बजनिक गरेको हो । जसमध्ये एमएक्स सिरिजमा पेट्रोल र डिजेल गरी २ वटा भेरियन्ट उपलब्ध हुने भएको छ । यी दुबै गाडी ५ सिटर म्यानुअल ट्रान्समिसनमा मात्र उपलब्ध हुनेछ । जसको मूल्य भारतीय बजारमा ११ लाख ९९ हजार र १२ लाख ४९ हजार रुपैयाँ तोकिएको छ । जुन नेपाल आइपुग्दा ६० लाख हाराहारी पर्ने अनुमान लगाउन सकिन्छ ।

त्यसैगरी एएक्स सिरिज अन्तर्गत एएक्स३, एएक्स५ र एएक्स७ सहित ३ ट्रिममा कुल १४ भेरियन्टको मूल्य सार्बजनिक गरिएको छ । महिन्न्द्राले यो सिरिजमा भने ५ र ७ सिटरको अप्सन दिएको छ भने सबै भेरियन्ट डिजेल र पेट्रोल इन्जिनसहित म्यानुअल र अटोमेटिक दुबै अप्सनमा उपलब्ध हुनेछ । जसमध्ये ५ सिटरको मूल्य पेट्रोलमा १३ लाख ९९ हजारदेखी १६ लाख ५९ हजार र डिजेलमा १४ लाख ५९ हजारदेखी १७ लाख १९ हजार रुपैयाँसम्म निर्धारण गरिएको छ ।

अर्को ७ सिटर अन्तर्गत पेट्रोलको १५ लाख ५९ हजारदेखी २० लाख ९९ हजार रुपैयाँसम्म र डिजेलको १५ लाख १९ हजारदेखी २१ लख ५९ हजार रुपैयाँसम्म निर्धारण गरिएको छ । ७ सिटर पेट्रोल इन्जिनको बेस भेरियन्ट एएक्स३ एमटीको भने मूल्य खुलाइएको छैन ।
एक्सयुभी७०० को सबैभन्दा महंगो भेरियन्ट भने एएक्स ७ अटोमेटिक हो । यो लक्जरी प्याक अप्सनमा समेत उपलब्ध हुनेछ । जसको मूल्य पेट्रोलको २० लाख ९९ हजार र डिजेलको २१ लख ५९ हजार रुपैयाँ निर्धारण गरिएको छ । यो गाडी नेपाल आउँदा यसमो मूल्य १ करोडमाथी पर्ने सहजै अनुमान लगाउन सकिन्छ ।

कम्पनीले महिन्द्रा एक्सयूभी७०० मा अटो बुस्टर हेडल्याम्प, सेगमेन्टको सबैभन्दा ठूलो प्यानोरमिक सनरूफ, स्मार्ट ह्यान्डल र व्यक्तिगत सुरक्षा सतर्कता रहेको छ । तीन पंक्ति एसयूभी मर्सिडिज बेन्जबाट प्रेरित डुअल स्क्रिन इन्फोटेनमेन्ट सिस्टम र इन्स्ट्रयुमेन्ट, लामो दुरीको लागि हेडल्याम्प बिम, इलेक्ट्रोनिक पार्किङ ब्रेक, ड्राइभ मोड, वायरलेस कनेक्टिभिटी, एडीएएसका साथै अन्य फिचर पनि समावेश गरिएको छ ।
सो एसयूभीमा आकर्षक ग्रिल, नयाँ एलईडी डीआरएलको साथमा नयाँ डिजाइनको सी आकारको हेडल्याम्प, स्मार्ट ह्यान्डल र एलईडी टेलल्याम्प समावेश गरिएको छ । ५ सिटर सेग्मेन्टमा यसले हुन्डाई क्रेटा, किया सेल्टोस, स्कोडा कुशांक र फक्सवागनको टाइगुनसँग प्रतिस्पर्धा गर्नेछ भने ७ सिटरमा हुन्डाई अल्काजार र टाटा सफारीसंग प्रतिस्पर्धा गर्नेछ ।

महिन्द्रा एक्सयूभी७०० मा पेट्रोल र डिजेल इन्जिनको विकल्प रहेको छ । एक्सयूभी७०० पेट्रोल भेरिएन्टमा नयाँ २.० लिटर एम स्टालियन टर्बोचार्ज्ड मोटर समावेश गरिएको छ, जसले २०० बीएचपी पावर र ३८० एनएम टर्क जेनेरेट गर्छ । सो एसयूभीको डिजेल भेरिएन्टमा २.२ एल एमहर्क युनिट रहेको छ, जसले १८५ बीएचपी पावर र ४५० एनएमसम्म टर्क जेनेरेट गर्छ ।