४ वर्षमै ३ लाख युनिट बिक्री भयो महिन्द्रा एक्सयूभी ७००, नेपालको अवस्था के ?

काठमाडौं–महिन्द्राको फ्ल्यागशिप एसयूभी एक्सयूभी ७०० ले भारतमा ३ लाख युनिट बिक्रीसहित नयाँ माइलस्टोन हासिल गरेको छ । लन्च भएको ४ वर्ष अवधिमा एक्सयूभी ७०० ले ३ लाख युनिट भन्दा बढी बिक्री भएको हो ।

अगस्ट २०२१ मा लन्च भएको सो एसयूभी मे २०२३ सम्ममा १ लाख युनिट बिक्री भएको थियो । जुन २०२४ मा २ लाख युनिट बिक्री हासिल गरेको एक्सयूभी ७०० ले त्यसपछिको अर्को १ वर्षमा ३ लाख युनिट बिक्रीको माइलस्टोल हासिल गरेको हो ।

५ र ७ सिटर कन्फिगरेसनमा उपलब्ध यस एसयूभी एमएक्स, एएक्स३, एएक्स५, एएक्स५ सेलेक्ट, एएक्स७ र एएक्स७ एल सहित कुल ६ भेरिएन्टमा उपलब्ध छ । हालै, महिन्द्राले यसको ब्लेज र इबोनी संस्करणको सुरुवातसंगै केही विशेष संस्करण समेत थपेको छ ।

पावरट्रेनको कुरा गर्नुपर्दा यसमा २.० लिटर टर्बो पेट्रोल र २.२ लिटर टर्बो डिजेल इन्जिनको विकल्प दिइएको छ । ६–स्पिड म्यानुअल वा ६–स्पिड ट्रान्समिसनको विकल्प पाइने यसको केही भेरिएन्टमा भने अल–ह्विल ड्राइभ अप्सन समेत पाउन सकिन्छ ।

भारतीय बजारमा यसको सुरुवाती मूल्य १४ लाख ४९ हजार भारुदेखि सुरु हुन्छ । नेपाली बजारमा समेत उपलब्ध यस एसयूभीको सुरुवाती मूल्य ७४ लाख निर्धारण गरिएको छ भने टप भेरिएन्टलाई १ करोड १० लाख रुपैयाँ पर्छ ।

नेपालमा २०७९ माघ महिनादेखि बिक्री सुरु भएको एक्सयूभी ७०० ले सुरुवाती दिनमा राम्रै प्रतिक्रिया पाएपनि पछिल्लो समय भने खासै गति लिन सकिरहेको छैन । ईभीको बढ्दो प्रभावले सो एसूभीको बिक्रीलाई प्रभावित पारेको हो ।