डुअल फ्रन्ट एयरब्याग सहित लन्च भयो महिन्द्रा बोलेरो

महिन्द्राले आफ्नो लोकप्रिय एसयुभी बोलेरोलाई डुअल फ्रन्ट एयरब्याग सहित लन्च गरेको छ । यसअघि मिडियम र टप भेरियन्टमा मात्र डुअल एयरब्याग दिँदै आएको कम्पनीले अब उप्रान्त भने बेस भेरियन्टमा समेत डुअल फ्रन्ट एयरब्याग उपलब्ध गराउने भएको हो । अगाडीको प्यासेन्जर साइडमा समेत एयर ब्याग थप गर्न उसले इन्टेरियरमा सामन्य परिबर्तन गरेको छ । अन्य फिचर्स भने रेगुलर मोडल सरहनै उपलब्ध रहनेछ ।

एयर ब्याग थप भएसंगै यसको मूल्य १६ हजार भारुसम्मले बृद्धि भएको छ । यो एसयुभीको नयाँ मूल्य ८ लाख ८५ हजारदेखी ९ लाख ८६ हजार भारुसम्म निर्धारण गरिएको छ । जुन बिएस४ र बिएस६ दुबै भर्सनमा उपलब्ध रहँदै आएको छ ।

यसको इन्जिन हाल कारोबार भैरहेको रेगुलर मोडलबाट लिइएको छ । यसमा जडान गरिएको १.५ लिटर थ्री सिलिन्डर एमहक डिजेल इन्जिनले ७५ एचपी पावर र २१० एनएम टर्क जेनेरेट गर्छ । बोलेरोमा अडियो सिस्टम, म्यानुअल एसी, किलेस इन्ट्रि, सेमी डिजिटल इन्स्ट्रुमेन्ट कन्सोल, इबिडी सहितको एबिएस, रिभर्स पार्किङ सेन्सर, हाइस्पिड वार्निङ, ब्लुतुथ कनेक्टिभिटी र युएसबी लगयात फिचर्स उपलब्ध रहँदै आएको छ ।

बोलेरो नेपाली बजारमा समेत निकै नै रुचाइएको बजेट एसयुभी हो । महिन्द्रा एसयुभीको कुल बिक्रीमा स्कर्पियोपछि दोस्रो स्थान ओगट्न सफल यसको मूल्य नेपाली बजारमा ३४ लाख ८५ हजारदेखी ३६ लाख ५० हजार रुपैयाँसम्म निर्धारण गरिएको छ ।