लुसिड एयरको इलेक्ट्रिक कारले सिंगल चार्जमा ८३० किमी रेन्ज प्रदान गर्ने घोषणा

अमेरिकी इलेक्ट्रिक कार कम्पनी लुसिडले पहिलो लक्जरी इलेक्ट्रिक सेडान कार एयर ड्रिम एडिसन सार्वजनिक गरेको छ । यो अमेरिकामा सबैभन्दा लामो रेन्जको इलेक्ट्रिक कार हो ।

कम्पनीका अनुसार सो कारले सिंगल चार्जमा लगभग ८३० किमीको रेन्ज प्रदान गर्नेछ । कारको यो रेन्ज अमेरिकी पर्यावरण संरक्षण एजेन्सी (इलेक्ट्रिक वाहनको आधिकारिक रेन्ज प्रमाणित गर्ने निकाय) द्वारा प्रमाणित गरिएको हो । यो ६५१ किमी रेन्ज भएको टेस्ला मोडेल एस लङको रेन्ज भन्दा लगभग २०० किमी बढी रहेको छ ।

लुसिड मोटरका सीईओ र टेस्ला मोडलका एस सेडानका पूर्व मुख्य इन्जिनियर पिटर राउलिन्सनले एयर ड्रिम एडिसनको आधिकारिक रेन्ज कुनै पनि इलेक्ट्रिक सवारीको लागि नयाँ रेकर्ड भएको जानकारी दिएका छन् । लुसिड एयर ड्रिम एडिसनको आधिकारिक रेन्जको रिलिज पछि कम्पनीको शेयरमा पनि उछाल देखिएको छ ।

लुसिड एयर ड्रिम एडिसन २ भेरिएन्ट रेन्ज र परफर्मेन्समा उपलब्ध रहेको छ । पर्यावरण संरक्षण एजेन्सी (ईपीए) द्वारा घोषित ८३६ किलोमिटर रेन्ज कम्पनीको ड्रिम एडिसन रेन्ज भेरिएन्टमा उपलब्ध रहेको छ । जसमा १९ इन्चको ह्वीलले सुसज्जित छ । त्यस्तै गरी १९ इन्चको ह्वीलको साथमा लुसिड एयर ड्रिम एडिसन परफर्मेन्स भेरिएन्ट ७५८ किलोमिटरको रेन्ज प्रदान गर्छ । यी दुबै भेरिएन्टमा २१ इन्च ह्वीलको विकल्प रहेको छ ।

कम्पनीको योजना ५०० भन्दा कम एयर ड्रिम एडिसन इलेक्ट्रिक लक्जरी सेडान बनाउनु हो । यस इलेक्ट्रिक कारको मूल्य करिव २ करोड रुपैयाँ हुने अनुमान गरिएको छ । यसमा ग्रान्ड टुरिङ भर्सन पनि हुनेछ र त्यसमा पनि लगभग ८३० किलोमिटरको रेन्ज उपलब्ध हुनेछ । दोस्रो भेरिएन्टको उत्पादन यस वर्षमा सुरू हुनेछ र यसको मूल्य १ करोड ६० लाख रुपैयाँ भन्दा थोरै बढी हुने अनुमान गरिएको छ ।