फुल चार्जमा ४८० किमि रेन्ज दिने विश्वको पहिलो इलेक्ट्रिक स्कुटर, यस्तो छ मूल्य र फिचर

भारतमा राफ्ट मोटर्सले सबै इलेक्ट्रिक स्कुटरहरुलाई पछाडि छोडेर नयाँ कीर्तिमान स्थापित गरेको छ । कम्पनीको नयाँ स्कुटर बढी रेन्ज प्रदान गर्ने संसारको पहिलो इलेक्ट्रिक स्कुटर भएको दावी गरिएको छ ।

राफ्ट मोटर्स टु ह्वील निर्माता कम्पनी हो । कम्पनीले इलेक्ट्रिक स्कुटरको क्षेत्रमा नयाँ रेकर्ड बनाएको छ । राफ्ट मोटर्सले हालै इन्डस एनएक्स इलेक्ट्रिक स्कुटर बजारमा ल्याउने घोषणा गरेको छ । कम्पनीले धनतरेसका दिन विश्वभर यो स्कुटर लन्च गर्ने जानकारी ट्विटरमार्फत दिएको छ ।

सो इलेक्ट्रिक स्कुटरले फुल चार्जमा ४८० किमीको दूरी तय गर्न सक्छ । साथै सो इलेक्ट्रिक स्कुटरमा नयाँ फिचर समावेश गरिएको छ । सो इलेक्ट्रिक स्कुटरमा एक लाख किमीको वारेण्टी र डबल ब्याट्रीको विकल्प प्रदान गरिएको छ ।

राफ्ट मोटर्सले नयाँ इलेक्ट्रिक स्कुटर तीन भेरिएन्टमा लन्च गरेको छ जसमा इन्ट्रि लेभल, मिड रेन्ज र टप भेरिएन्ट समावेश रहेको छ । इन्ट्रि लेभल मोडलमा ४८भी ६५एएचको रिमुभेबल लिथियम आयोन ब्याट्री समावेश गरेको छ । यसको ब्याट्री स्कुटरबाट हटाएर चार्ज गर्न सकिन्छ । यसको ब्याट्री फुल चार्जमा १५६ किमीको रेन्ज दिने क्षमता रहेको छ । इन्डस एनएक्स इन्ट्रि लेभल भेरिएन्टको मूल्य १ लाख १८ हजार ५०० भारु एक्स–शोरूम तोकिएको छ ।

इन्डस एनएक्स मिड रेन्ज भेरिएन्टमा कम्पनीले ४८भी १३५ एएचको फिक्स्ड ब्याट्री प्याक समावेश गरेको छ । यसको ब्याट्री स्कुटरबाट हटाएर चार्ज गर्न सकिदैन । यसको ब्याट्री फुल चार्जमा ३२४ किमीको दूरी तय गर्ने क्षमताको रहेको छ । मुम्बईमा यो भेरिएन्टको एक्स शोरूम मूल्य १ लाख ९१ हजार ९७६ भारु रहेको छ ।

इन्डस एनएक्सको टप भेरिएन्टमा कम्पनीले डुअल ब्याट्री प्याकको विकल्प दिएको छ । जसको ९.६ केडब्ल्युएचको क्षमता रहेको छ । फुल चार्जमा यो स्कुटरले ४८० किलोमिटर भन्दा धेरै रेन्ज प्रदान गर्छ । यसको एक्स शोरूम मूल्य २ लाख ५७ हजार ४३१ भारु तोकिएको छ ।

इन्डस एनएक्स स्कुटरमा रिभर्स गियर, थेफ्ट अलार्म, किलेस–स्टार्ट, रिमोट–लकिङ, स्टाइलिस डिस्क ब्रेक र चाइल्ड सेफ पार्किङ मोड जस्ता एड्भान्स फिचर उपलब्ध रहेको छ । चार्जिङको लागि स्कुटरमा १० एम्पियरको फास्ट चार्जिङ समावेश गरेको छ ।

राफ्ट मोटर्सको भारतमा ५५० भन्दा बढी शहरमा डिलरशिप उपलब्ध रहेको छ । कम्पनीले मार्च २०२२ सम्म भारतको हरेक जिल्लामा र मार्च २०२३ सम्म विश्वको हरेक देशमा डिलरशिप खोल्ने योजना रहेको जानकारी दिएको छ । राफ्ट मोटर्सले हालै एन्ड्रोइडमा आधारित स्मार्ट टिभी र हाई–फाई कराओके साउन्ड सिस्टम पनि लन्च गरेको छ ।