दसैं वा तिहारमा इलेक्ट्रिक कार किन्ने सोच छ ? माफ गर्नुहोला, तपाईको पालो आउँदैन

काठमाडौं – चाडपर्वको छेको पारेर दसैं वा तिहारमा इलेक्ट्रिक कार किन्ने सोच बनाउनु भएको छ भने तपाईले कार पाउने सम्भावना एकदमै कम छ । तपाईले कार पाउने वा नपाउने कुरा तपाईले रोजेको ब्रान्डमा भर पर्न सक्छ । यसले गर्दा तपाईले यो दसैं वा तिहारमा इलेक्ट्रिक कार चढ्न पाउने सम्भावना भने कमै छ ।

नेपाली बजारमा बिक्रीका लागि इलेक्ट्रिक कार उपलब्ध गराइरहेका अधिकांश आयातकर्ताहरुले ग्राहकले खोजेको संख्यामा सवारी साधन उपलब्ध गराउन सकेका छैनन् । तर यस्ता इलेक्ट्रिक कारको माग धेरै भएर भने यसो भएको होइन । यसमा संख्याका साथै अन्य कुराले समेत असर पारेको छ ।

नेपाली बजारमा उपलब्ध इलेक्ट्रिक कार मध्ये किया निरो एक हो । तर हाल किया निरो खोज्नेका लागि गाडी उपलब्ध छैन र तिहार अगाडि नयाँ ग्राहकका लागि गाडी आउने सम्भावना पनि छैन । कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजका असिस्टेन्ट जनरल म्यानेजर मन्जित पोखरेलका अनुसार केही संख्यामा गाडी उपलब्ध भए पनि यी सबै बुकिङ भइसकेका छन् ।

नयाँ बजेट पश्चात करिव ४० गाडी डेलिभरी भइसकेको र लगभग त्यति नै संख्यामा बुकिङ भइसकेको छ । विशेष गरी सेमी कन्डक्टर अभावको कारण कम्पनीले चाहेजति इलेक्ट्रिक गाडी उत्पादन गर्न नसकेको र त्यही अनुसार निर्यात गर्न पनि सकेको छैन । यसको असर कियाका नेपाली ग्राहकलाई पनि पर्ने भएको छ ।

यद्यपि हुन्डाईका कोना र आयोनिक इलेक्ट्रिक गाडी खोज्नेका लागि भने हाल केही संख्यामा गाडी उपलब्ध हुन सक्छ । तर पनि ग्राहकले आफूले रोजे अनुसारको कलर र भेरिएन्टमा गाडी उपलब्ध गराउन नसकिने हुन्डाईको नेपालका लागि आधिकारिक वितरक लक्ष्मी इन्टरकन्टिनेन्टलका मार्केटिङ म्यानेजर सन्दीप शर्मा बताउँछन् ।

नयाँ बजेट घोषणा पश्चात इलेक्ट्रिक गाडीको वारेमा इन्क्वायरी निकै नै बढेको र बुकिङ समेत बढेको छ । केही दिनमै हुन्डाईले चाडपर्व लक्ष्यित स्किम समेत ल्याउने उनले बताए ।

नेपाली बजारमा एमजी ईजेडएस इलेक्ट्रिक गाडी उपलब्ध गराउदै आएको पारामाउन्ट मोटर्सले २ महिना पहिले बुकिङ गरेका ग्राहकलाई मात्र यो गाडी उपलब्ध गराउने तयारी गरेको छ । चीनबाट गाडी नेपाल पठाउदा प्रशस्तै संख्यामा पठाउन नसकिने र अन्य देशलाई समेत कम्पनीले प्राथमिकता दिनु पर्ने भएकाले आवश्यक संख्यामा गाडी उपलब्ध गराउन नसकिएको कम्पनी स्रोतको भनाइ छ । अहिले बुकिङ गर्ने ग्राहकलाई आगामी डिसेम्बर वा जनवरी सम्ममा मात्र गाडी उपलब्ध गराउन सकिने बताइएको छ ।

टाटाको इलेक्ट्रिक कार नेक्सन ईभी नेपाल भित्रिएको धेरै भएको छैन । तर पनि करिव ५ सय युनिट गाडी बुकिङ भइसकेको र नेपाली बजारमा भने जति गाडी पु¥याउन नसकिएको टाटाको नेपालका लागि आधिकारिक वितरक सिप्रदी ट्रेडिङ कम्पनी स्रोतले बताएको छ । विश्वव्यापी रुपमा सेमी कन्डक्टरको अभाव भइरहेको र इलेक्ट्रिक गाडीमा प्रयोग गरिने चिपका लागि यो आवश्यक भएकाले अन्य गाडीका साथै नेक्सन ईभी उत्पादनमा समेत यसको प्रत्यक्ष असर देखिएको छ । भारतीय बजारमा समेत करिव ६ महिना सम्म ग्राहकले यो गाडी डेलिभरीका लागि पर्खिनु पर्ने अवस्था भएकोमा नेपालमा पनि यही अवस्था छ ।

सिप्रदी ट्रेडिङका अनुसार हाल सम्मको अवस्थामा पहिले बुकिङ गरेका ग्राहकहरुलाई डिसेम्बर महिना सम्ममा गाडी डेलिभरी दिइने र अब बुकिङ गर्ने ग्राहकले भने सन् २०२२ देखि मात्र गाडी लिन पाउने छन् ।

डेरी ब्रान्डका इलेक्ट्रिक कार ईभी७ र ईएम७ उपलब्ध गराउदै आइरहेको अटोहोस्ट प्रालिका म्यानेजिङ डाइरेक्टर नवराज पौडेल बजेटले गरेको नयाँ व्यवस्था पश्चात छोटो समयमै चाडपर्व आएको र कोभिड–१९ को कारणले पनि व्यवसायीहरुले प्रशस्तै संख्यामा गाडी भित्र्याउन नसकेको बताउछन् । यद्यपि अटोहोस्टले करिव ३०,३५ हाराहारीको संख्यामा मात्र अहिले बुकिङ लिएको र ती ग्राहकलाई गाडी उपलब्ध गराउने तयारी गरिरहेको उनले बताए । धेरै संख्यामा माग भएमा गाडी उपलब्ध गराउन समस्या पर्ने उनको भनाइ छ ।

गत आर्थिक वर्षको बजेटमार्फत इलेक्ट्रिक गाडीको अन्तःशुल्क र भन्सार दर बढाइएकोमा यो वर्षको बजेटमार्फत यसलाई घटाइएको छ । यसले गर्दा धेरैले इलेक्ट्रिक गाडीप्रति रुचि देखाएका छन् । तर पनि विश्वव्यापी रुपमा भएको सेमी कन्डक्टरको अभाव र न्यून उत्पादन संख्याले गर्दा नेपाली ग्राहकले खोजेकै समयमा इलेक्ट्रिक गाडी पाउने सम्भावना कम भएको छ ।