३०० किलोमिटर रेन्ज, टिएफटी डिस्प्ले र क्रुज कन्ट्रोल समेत भएको इलेक्ट्रिक स्कुटर लन्च

चाइनिज इभी मेकर हर्विनले एसके३ इलेक्ट्रिक स्कटरको २०२२ मोडल लन्च गरेको छ । लामो रेन्ज दिने यो स्कुटरमा कनेक्टिभिटी फिचर्स र युटिलिटी सहतिको बुट स्पेस उपलब्ध गराइएको छ । यो स्कुटरमा ७२ भोल्ट ३६ एम्पियर आवर क्षमताको ट्विन व्याट्री प्याक जडान गरिएको छ । जसमध्ये सिंगल व्याट्रिले १६० र दुइवटै व्याट्रीलाई फुल चार्ज गर्दा ३०० किलोमिटर रेन्ज प्राप्त गर्न सकिने दाबी गरिएको छ ।

यो स्कुटरमा ३.१ किलोवाट क्षमताको मोटर जडान गरिएको छ । जसको अधिकतम पावर ६.३ किलोवाट रहेको छ भने यसलाई ९० किलोमिटर प्रतिघन्टाको उच्च गतिमा हाँक्न सकिन्छ । यसमा फुल कलर टिएफटी डिस्प्ले, व्लुटुथ कनेक्टिभिटी, किलेस पावर सिस्टम र क्रुज कन्ट्रोल जस्ता आधुनिक फिचर्स समेत उपलब्ध गराइएको छ ।

सार्प एन्ड मस्कुलर वडी प्यानलले प्रिमियम लुक्स दिएको यो स्कुटरमा ट्विन विम एलइडी हेडल्याम्प, ठूलो विन्डस्क्रिन र एलोई ह्विल्स दिइएको छ । चीन सहित युरोपियन बजारमा कारोबार हुँदै आइरहेको यो स्कुटर छिट्टै भारतीय बजार सहित अन्य एसियाली मुलकमा समेत उपलब्ध हुन सक्ने अनुमान लगाइएको छ ।