वर्षातमा लामो यात्रामा निस्कदै हुनुहुन्छ ? यसरी हेर्नुस् देशभरका सडकको लाइभ अपडेट

काठमाडौं – वर्षातको मौसम प्रारम्भ भइसकेको छ । यो अवस्थामा सडक मार्गबाट एक स्थानदेखि अर्को स्थान जानका लागि समस्या हुन सक्छ । विशेष गरी बिग्रिएको सडकका कारण बीच बाटोमै अलपत्र पर्ने सम्भावना पनि हुन्छ ।

यो अवस्थामा घरैमा बसेर सडकको अवस्था हेर्न सकियो भने कति सजिलो होला ? यसका लागि सडक विभागले अवरुद्ध सडकखण्डको विषयमा अनलाइन लाइभ अपडेटमार्फत जानकारी दिँदै आएको छ । यहाँ क्लिक गरेर विभागको सम्भार शाखाले सुरु गरेको लाइभ अपडेट थाहा पाउन सकिन्छ ।

गुगल डक्सको एक्सेल शिटमा उपलब्ध गराइएको लाइभ अपडेटमा अवरुद्ध सडक, आंशिक सुचारु र पूर्णरुपमा सुचारु भएको अवस्था देख्न सकिन्छ । गुगल शिट खोलिसकेपछि राजमार्गको नाम भएको सूचीमा जानु पर्छ ।

आफूले जानकारी लिन चाहेको राजमार्ग रोजेर त्यस अघिल्तिर क्रमशः सडक अवरुद्ध भएको समय, सडक सुचारु हुने अनुमानित समय, हालको अवस्था, सडक सुचारु भएको समय, सम्पर्क व्यक्ति तथा कार्यालय प्रमुखको नम्बर र सडक सुचारु गर्न भइरहेको प्रयास आदिको जानकारी पाउन सकिन्छ ।

यो वर्ष गत जेठ ३० देखि यसरी लाइभ अपडेट प्रारम्भ भएको हो ।