चेरीले ल्यायो ईभी ब्याट्रीमा आजीवन वारेन्टी, समस्या आए नयाँ गाडी नै दिइने

चीनमा सवारी साधनका लागि नयाँ र कडा ब्याट्री सुरक्षा मापदण्ड लागू भएपछि चेरी अटोमोबाइलले आफ्ना ग्राहकहरूका लागि एक ऐतिहासिक घोषणा गरेको छ ।

कम्पनीले चीनमा ‘राइनो ब्याट्री प्याक’ जडान भएका आफ्ना सबै न्यू इनर्जी भेइकल(एनईभी) मा आजीवन ब्याट्री वारेन्टी प्रदान गर्ने घोषणा गरेको हो ।

जुलाई १, २०२६ देखि चीनमा लागू भएको नयाँ ब्याट्री सुरक्षा मापदण्डपछि उपभोक्ताहरूमाझ विद्युतीय गाडीप्रति विश्वास जगाउने उद्देश्यले कम्पनीले यो ठूलो अभियान सुरु गरेको हो ।

ब्याट्री पड्किए वा आगो लागे नयाँ गाडी नै क्षतिपूर्ति
चेरीका अधिकारीहरूका अनुसार यो वारेन्टी व्यक्तिगत (गैर–व्यावसायिक) प्रयोजनका लागि गाडी खरिद गर्ने पहिलो ग्राहकका लागि मात्र मान्य हुनेछ । यस वारेन्टीले ब्याट्री मात्र नभई इलेक्ट्रिक मोटर र कन्ट्रोल युनिट (नियन्त्रण एकाइ) लाई समेत समेट्नेछ ।

हाल बिक्रीमा रहेका वा बेचिएका कुनै पनि मोडलमा मानवीय गल्तीबिना ब्याट्री खराब भई आगो लाग्ने वा अत्यधिक तातिने समस्या आएमा, कम्पनीले चीनमा सोही मोडलको नयाँ गाडी नै क्षतिपूर्तिको रूपमा उपलब्ध गराउने कम्पनीको भनाई छ ।

हाल चेरी अटोमोबाइल अन्तर्गतका चार प्रमुख ब्रान्ड चेरी, एक्सीड जेटोर र आईकारमा राइनो ब्याट्री प्रयोग गरिएको छ ।