विराटनगर यातायात कार्यलयद्वारा चालक अनुमति पत्र प्रदान सुरु

काठमाडौं– यातायात व्यवस्था कार्यालय विराटनगरले अवरुद्ध सवारीचालक अनुमति पत्र(लाईसेन्स) प्रदान सेवा सञ्चालनमा ल्याएको छ । गत भदौ २३ र २४ गते भएको जेनजी आन्दोलनमा यातायात व्यवस्था विभागको ‘सर्भर’ प्रणालीमा क्षति पुगी रोकिएको सेवा पुनः सञ्चालनमा आएको हो ।

विभागको सर्भर सञ्चालन भएपछि सेवा सुचारु गरिएको कार्यलय स्रोतले जनाएको छ । चालक अनुमति पत्रका लागि लिखित तथा ‘ट्र्याल’ परीक्षा समेत सुरु गरिएको छ । कार्यालयले गत भदौ ३० गतेदेखि सवारी दर्ता, सवारी दर्ता खारेज, दर्ता खारेज, नामसारी तथा सवारी लगत कट्टालगायत सेवा सुरु गरे पनि सवारीचालक अनुमति पत्रसम्बन्धी सेवा भने सञ्चालनमा ल्याउन सकेको थिएन ।

कार्यालयमा सबै प्रकारको सेवा लिन दैनिक १५० देखि २०० जना सेवाग्रही आउने गरेको छन् । कार्यालयले हप्तामा तीनपटक सवारीचालक अनुमति पत्रका लागि परीक्षा लिँदै आएको छ ।

कार्यालयले दुई तथा चारपाङ्ग्रे सवारीसाधनसहित सबै प्रकारको सवारीसाधनका लागि सवारीचालक अनुमति पत्र उपलब्ध गराउँदै आइरहेको छ । विराटनगर कार्यालयले विसं २०७९ साउनदेखि सवारीचालक अनुमति पत्रसम्बन्धी सेवा प्रदान गर्दै आइरहेको छ ।