दैनिक कोटा तोकेर लाइसेन्स नवीकरण, राजस्व संकलन र वितरण प्रारम्भ

काठमाडौं – काठमाडौं उपत्यकामा यातायात व्यवस्था कार्यालयहरुले सवारी चालक अनुमतिपत्र नवीकरण, ट्रायल परीक्षा उत्तीर्ण भएका परीक्षाथीहरुको राजस्व संकलन र सवारीचालक अनुमतिपत्र वितरणको काम सुरु गरेका छन् ।

सरकारले कोरोनाको महामारीले गर्दा गरेको निषेधाज्ञा खुकुलो गरेसँगै उक्त काम पनि सुरु भएको हो । यातायात व्यवस्था कार्यालय ठूलो भर्याङले सवारी चालक अनुमतिपत्र नवीकरण, ट्रायल परीक्षा उत्तिण भएका परिक्षार्थीको राजस्व संकलन र सवारीचालक अनुमतिपत्र वितरणका काम सुरु भएको बताएको छ ।

यसको लागि कोटा भने निर्धाराण गरिएको छ । सवारीचालक अनुमतिपत्र नवीकरण दैनिक ७०, ट्रायल परीक्षा उत्तिर्ण भएका परिक्षार्थीको राजस्व संकलन दैनिक ७० र सवारीचालक अनुमतिपत्र वितरण दैनिक २०० वटा मात्रै हुनेछ ।

त्यसैगरी यातायात व्यवस्था कार्यालय वागमती प्रदेश ललितपुरले असार १० देखि सेवा सुचारु हुने जनाएको छ । ललितपुरको एकान्तकुनास्थित कार्यालयबाट दैनिक १०० १०० जनाको सवारी चालक अनुमति पत्र नवीकरण र ट्रायल पास राजस्व संकलन गरिने छ भने २०० जनाको अनुमति पत्र वितरण गरिने छ ।

यसको लागि भने सरकारले निर्धारण गरेको स्वास्थ्यको मापदण्ड पुरा गर्नुपर्ने छ ।