खुकुलो मौद्रिक नीतिको पर्खाईमा अटोमोबाइल व्यवसायी, भन्छन् – बिक्री बढ्न सकेन

काठमाडौं – सरकारले बजेट तथा अन्य नीतिमार्फत विभिन्न व्यवस्था गरे पनि अटोमोबाइल व्यवसायीले राहत महसुस गर्न सकेका छैनन् । लगातार रुपमा लागिरहेको आयात प्रतिबन्ध खुला भए पनि त्यसको प्रत्यक्ष असर देखिन सकेको छैन । यो अवस्थामा आगामी दिनमा सार्वजनिक हुने मौद्रिक नीतिले मात्र केही राहत प्रदान गर्ने आशामा उनीहरु रहेका छन् ।

विदेशी मुद्रा सञ्चितिमा दबाब पर्न थालेपछि आर्थिक वर्ष २०७८/७९ को अन्त्यतिर सरकारले अटो कर्जासम्बन्धी व्यवस्थामा कडाइ गर्‍यो । त्यसको केही समयपछि अटोमोबाइलको आयातमै सरकारले प्रतिबन्ध लगायो । कर्जामा कडाइ र आयात प्रतिबन्धले अटोमोबाइल व्यवसाय नै धराशयी बन्न पुग्यो ।

अटोमोबाइल व्यवसायीको दबाब र वैदेशिक मुद्रा सञ्चितिमा सुधार आएपछि सरकारले आयात प्रतिबन्ध हटाइसकेको छ । तैपनि अटोमोबाइल्सको विक्री बढ्न नसकेको व्यवसायी बताउँछन् ।

हाल बजारमा रहेको आर्थिक शिथिलता र क्रयशक्तिमा आएको कमीको प्रत्यक्ष असर यो व्यवसायमा पुगेको छ । त्यसैगरी मौद्रिक नीति समेत कसिलो बनेको कारण झनै असहज भएको छ ।

यो अवस्थामा मौद्रिक नीतिमार्फत अटो कर्जामा जोखिम भार कम गर्न र हायर पर्चेज कर्जाको सीमा बढाउन सरकारलाई सुझाव दिएको छ । गतवर्षबाट वृद्धि भई १५० प्रतिशत कायम भएको अटो कर्जाको जोखिम भारलाई पुरानै ७५ प्रतिशत कायम गर्नुपर्ने नाडाको माग छ । नाडाले हायर पर्चेज कर्जाको सीमालाई पनि अहिलेको ५० प्रतिशतबाट बढाएर ८० प्रतिशत कायम गर्न आग्रह गरेको छ । पहिले पनि हायर पर्चेज कर्जाको सीमा ८० प्रतिशत नै थियो ।

बैंक तथा वित्तीय संस्थामा तरलताको अवस्था सुधार भइसक्दा पनि उच्च जोखिम भारका कारण अटोमोबाइल क्षेत्रमा लगानी नआएको नाडा अटोमोबाइल्स एसोसिएसन अफ नेपालका अध्यक्ष ध्रुव थापा बताउँछन् ।

यो अवस्थामा आगामी दिनमा आउने मौद्रिक नीतिले केही सम्बोधन गरेमा यो व्यवसायलाई अगाडि बढाउन सहयोग पुग्ने व्यवसायीहरुको भनाइ छ ।