ग्राहकले पाउन थाले लिपमोटर बी०३एक्स एसयूभी

काठमाडौं–लिपमोटरको नेपालका लागि आधिकारिक वितरक सांग्रिला मोटर्स प्रालिले नयाँ इलेक्ट्रिक एसयूभी बी०३एक्सको डेलिभरी सुरु गरेको छ । काठमाडौंमा सडक परीक्षण तथा औपचारिक सार्वजनिक कार्यक्रम सम्पन्न गरेपछि कम्पनीले पहिलो चरणका ग्राहकलाई गाडी हस्तान्तरण गरेको हो ।

डेलिभरी सुरु भएको अवसरमा सांग्रिला मोटर्सका निर्देशक हेमन्त गोल्छाले बी०३एक्सप्रति ग्राहकले देखाएको उत्साह र विश्वासप्रति धन्यवाद व्यक्त गरे । बाँकी बुकिङ भएका गाडी पनि छिटो ग्राहकसम्म पु-याउन कम्पनीको टोली सक्रिय रहेको उनले बताए ।

नेपाली सडक र भूगोललाई ध्यानमा राखेर ल्याइएको बी०३एक्समा १४५ किलोवाटको मोटर र ५३ किलोवाट आवर क्षमताको ब्याट्री दिइएको छ । कम्पनीका अनुसार यसले एकपटकको फुल चार्जमा ५०५ किलोमिटरसम्म रेन्ज प्रदान गर्छ । यसमा १९० एमएम ग्राउन्ड क्लियरेन्स उपलब्ध छ ।

फास्ट चार्जरको प्रयोग गर्दा यसको ब्याट्री १६ मिनेटमै ३० देखि ८० प्रतिशतसम्म चार्ज गर्न सकिने कम्पनीको दाबी छ । एसयूभीमा १४.६ इन्चको इन्फोटेनमेन्ट टचस्क्रिन, १२ वटा स्पिकरयुक्त साउन्ड सिस्टम र लेभल २ एडास प्रविधि समावेश छन्। यसको ५१० लिटरको बुट स्पेसलाई पछाडिको सिट फोल्ड गरेर १ हजार ६०५ लिटरसम्म विस्तार गर्न सकिन्छ ।

स्टेलान्टिस समूह अन्तर्गतको लिपमोटरले हालसम्म विश्वभर १९ लाखभन्दा बढी गाडी बिक्री गरिसकेको छ । विश्वका ४५ भन्दा बढी देशमा २ हजारभन्दा बढी बिक्री तथा सेवा केन्द्र रहेको लिपमोटरले नेपाली बजारमा पनि आफ्नो उपस्थिति विस्तार गर्ने लक्ष्य राखेको छ ।