हुन्डाईद्वारा गण्डकी प्रदेश सरकारलाई ५० लाख बराबरको स्वास्थ्य सामग्री हस्तान्तरण

काठमाडौं – नेपालको लागि हुन्डाई मोटर्सको आधिकारिक विक्रेता लक्ष्मी हुन्डाई (लक्ष्मी इन्टरकन्टिनेन्टल प्रालि) ले हुन्डाई मोटर कम्पनी कोरियाको सौजन्यमा ५० लाख रुपैयाँ बराबरका कोभिड–१९ उपचारका लागि आवश्यक स्वास्थ्य सामग्री प्रदान गरेको छ ।

हुन्डाईले उपचारको समयमा चाहिने पीपीईलगायतका आवश्यक सामग्रीहरु गण्डकी प्रदेश सरकार, सामाजिक विकास मन्त्रालयलाई बैशाख २४ गते आयोजना गरिएको एक कार्यक्रममा हस्तान्तरण गरिएको बताएको छ ।

हाल विश्वभर फैलिदै गरेको कोरोना भाइरस (कोभिड–१९) को संक्रमण रोकथाममा मद्दत गर्नका लागि सो स्वास्थ्य सामग्रीहरु प्रदान गरिएको हो । यसको मुल उद्देश्य आवश्यकता परेका बिरामीहरुलाई समयमा र सही तरिकाले उपचार प्रदान गर्नु रहेको छ ।

लक्ष्मी हुन्डाईले सधैें यस्ता परोपकारी उद्देश्यहरुलाई आफ्नो कर्पोरेट सामाजिक उत्तरदायित्व अन्तर्गत सहयोग गर्दै आइरहेको बताएको छ । लक्ष्मी ग्रुपले कोरोना भाइरस संक्रमण रोकथाम, नियन्त्रण र उपचार कोषमा र१ करोड सहयोगका साथै फिभर क्लिनिक स्थापना लागि आर्थिक सहयोग गरेको थियो । यो वाहेक ग्रुपले अन्य विभिन्न सामाजिक कार्यमा समेत सहयोग गर्दै आएको छ ।

लक्ष्मी हुन्डाई लक्ष्मी ग्रुपको भगीनी संस्था हो ।