विश्वभर १०० युनिट मात्र उत्पादन हुने केटीएम स्पोर्ट बाइक ४ मिनेट ३२ सेकेन्डमै सोल्ड आउट

केटीएमले गत हप्ता अर्थात जुलाई २२ मा आरसी ८सी बाइकका लागि प्रि–अर्डर खोल्यो । अष्ट्रियन कम्पनी केटीएमको सो बाइक यति लोकप्रिय बन्यो कि ४ मिनेट ३२ सेकेन्डमै यसको १०० युनिट बुकिङ भयो ।

विश्वभर १०० युनिट मात्र उत्पादन गरिने केटीएम आरसी ८सी ट्रयाक वान्ली र ट्रयाक रेडी मोटरसाइकल हो । जसलाई बिक्री हुनको लागि ५ मिनेटको समय पनि लागेन । यसको मूल्य ३८ हजार ९९९ डलर तोकिएको छ ।

आरसी ८सी बाइकमा ८९० ड्युकको पावरफुल इन्जिन समावेश गरिएको छ । सो बाइकमा ८८९ सीसी, प्यारालल ट्वीन एलसी८सी इन्जिन समावेश गरिएको छ । सो इन्जिनले १२३ बीएचपीको पावर र १०१ एनएमको टर्क जेनेरेट गर्छ । बाइकमा एक्रापोविक टाइटेनियम मफलर, डेडिकेटेड एयर बक्स र रेसिङ एयर फिल्टरको साथै रेसिङ एक्जस्टबाट यसको परफर्मेन्सलाई बढाउन सकिन्छ ।

केटीएम आरसी ८सी ट्रयाक बाइक हो । जसलाई केटीएम फ्याक्ट्री रेसिङ टिम र यूएस आधारित क्रेमर बाइकद्वारा संयुक्त रुपमा विकसित गरिएको थियो । ८सी को डिजाइनमा विशेषगरी फ्रन्टको फेयरिङमा ध्यान दिइएको छ । सो बाइक खरिद गर्ने १०० जना ग्राहक मध्ये २५ जना ग्राहकले विशेष ट्रयाकको अनुभव लिन सक्नेछन् । सो प्याकेजमा फ्रन्ट र रियर डिस्कको एक जोडा, डायमग ह्वीलको अतिरिक्त सेट, टायर वार्मर, केटीएम रेस कारपेट, र फ्रन्ट र रियर पेडाक समावेश रहेको छ ।