नेपाली बजारमा छैन केटीएम १२५ ड्युक : २०० ड्युकका कारण ओझेलमा

केटीएमका विभिन्न मोडलका बाइक नेपाली बजारमा उपलब्ध छन् । ती मध्ये अन्तर्राष्ट्रिय बजारमा उपलब्ध अन्य सबै मोडल नेपाली बजारमा भए पनि केटीएम १२५ ड्युक भने हाल नेपाली बजारमा उपलब्ध छैन ।

अन्तर्राष्ट्रिय बजारमा लोकप्रिय रहेको यो बाइक अहिले पनि केही नेपाली राइडरहरुले प्रयोग गरिरहेका छन् । कुनै समयमा यो नेपाली बजारमा पनि बिक्रीका लागि उपलब्ध थियो । पहिलो पटक नेपालका लागि केटीएमको आधिकारिक वितरक हंसराज हुलासचन्द एन्ड कम्पनीले नाडा अटो शो २०७६ मा यो बाइक सार्वजनिक गरेको थियो । त्यतिबेला यसको प्रारम्भिक मूल्य ४ लाख ५० हजार रुपैयाँ तोकिएको थियो ।

केटीएम ड्युक १२५ लाई यो सेग्मेन्ट अन्तर्गत सबैभन्दा पावरफुल मोटरसाइकलको रुपमा लिइन्छ । यसमा उपलब्ध १२४.७ सीसी लिक्वीड कुल्ड सिंगल सिलिन्डर इन्जिनले ९ हजार २ सय ५० आरपीएममा १४.५ बीएच पावरका साथै ८ हजार आरपीएममा १२ एनएम टर्क उत्पादन गर्छ । यसको इन्जिनमा ६ स्पीड गियरबक्स लगाइएको छ ।

यो मोटरसाइकलमा एबीएस समेत उपलब्ध छ । त्यतिबेला यो नेपाली बजारमा एबीएस भएको १२५ सीसीको पहिलो मोटरसाइकल समेत थियो ।

मोटरसाइकलमा केटीएम ड्यूक २०० को स्टाइल दिइएको छ । यसमा उपलब्ध टीएफटी इन्स्ट्रुमेन्ट क्लस्टर, एलइडी हेडल्याम्प, आकर्षक बडी निकै एग्रेसिव लुक दिएको छ ।

तर केही समय पश्चात यो नेपाली बजारमा उपलब्ध भएन । कम्पनी स्रोतका अनुसार २०० ड्युकको तुलनामा मूल्यमा केही मात्र अन्तर भएको र फिचर पनि उस्तै हुने भएकाले धेरैले २०० सीसीको बाइक रुचाउने भएकाले यसलाई नेपाली बजारमा उपलब्ध नगराइएको हो ।

हाल नेपाली बजारमा उपलब्ध २०० ड्युकको मूल्य ५ लाख ८४ हजार ९ सय रुपैयाँ छ ।