कम मूल्यमा मिनी इभी उतार्ने कियाको योजना, ४ वर्षमा १३ नयाँ इभी आउने

कोरियन अटो निर्माता कियाले इभी लाइनअपमा आफ्नो उत्पादन विस्तार गर्ने योजना बनाएको छ । सन् २०२७ सम्ममा १३ नयाँ इभी थप्ने लक्ष्य लिएकोे कम्पनीले सस्तो मूल्यमा मिनी इभी समेत ल्याउने योजना बनाएको हो ।

कम्पनीको यूरोपेली बजार प्रमुख डेभिड हिलवर्टका अनुसार यसरी थपिने नयाँ मोडलमा सिटी कार इभी१ देखी फूल साइज एसयूभी इभी९ सम्म रहनेछ । जसमध्ये साना इभीको बजार युरोप लक्षित रहने उनले जनाएका छन् ।

इभी संगै कम्पनीले पावरट्रेनमा विभिन्न विकल्प दिने योजना समेत बनाएको छ । कियाले हाल बिक्री गर्दै आएको निरो इलेक्ट्रिक, हाइव्रिड र प्लग–इन हाइव्रिड पावरट्रेनमा उपलब्ध रहँदै आएकोमा केही नयाँ मोडलमा समेत यसरी विभिन्न भेरिएन्ट दिन लागिएको हो ।

कियाले निकट भविष्यमै आफ्नो इभी५ मोडललाई चीनमा लन्च गर्ने योजना बनाएको छ । यसैगरी यूरोपेली बजारलाई लक्षित गरी पूजो ई २००८ संग प्रतिस्पर्धा गर्ने गरी उसले इभी३ लाई उतार्ने तयारी गरेको छ । साथै फक्सवागन आइडी–२ संग प्रतिस्पर्धा गर्नेगरी इभी१ ल्याउने समेत कम्पनीको योजना छ ।