सेल्टोस फेसलिफ्टको सुरुवाती मूल्य १० लाख ९० हजार भारु, यस्ता छन् फिचर

कियाले आज भारतमा आफ्नो लोकप्रिय एसयुभी सेल्टोसको फेसलिफ्ट लन्च गरेको छ । केहीदिन अघिबाट वुकिङ लिन थालिएको सो एसयूभीले पहिलो दिनमै १३ हजार ४२४ बुकिङ प्राप्त गरेर यो सेगमेन्टमा सबैभन्दा धेरै बुकिङ हुने गाडीको रेकर्ड कायम गरेको थियो ।

कम्पनीले नयाँ सेल्टोस ६ भेरिएन्ट र ८ कलर विकल्पमा लन्च गरेको हो । जसको सुरुवमती मूल्य १० लाख ९० हजार कायम गरिएको छ भने टप मोडलको २० लाख भारुसम्म पर्ने कम्पनीले जनाएको छ । सो एसयूभीलाई १.५ लिटर पेट्रोल एमटी, पेट्रोल सीभीटी, टर्वो पेट्रोल आइएमटी, टर्वो पेट्रोल डीसीटी, डिजेल आइएमटी र डीजेल एटी भेरिएन्टमा उपलब्ध गराइएको हो । यसमा एडीएएस जस्ता सेफ्टी फिचर थपसहित ३ वटा इन्जिनको विकल्प छ ।

नयाँ सेल्टोसमा इन्टेरियर र एक्सटेरियरको डिजाइनमा पनि परिवर्तन गरिएको छ । साथै कारको फ्रन्ट लुकमा पनि पूर्ण रूपमा परिवर्तन गरिएको छ । कारको अलोय ह्विल पनि परिवर्तन गरिएको छ । कारको इन्टेरियरको कलर थिम र अपहोल्स्ट्री पनि परिवर्तन गरिएको छ । यसमा १०।२५ इन्चको ड्युअल स्क्रिन, इन्फोटेनमेन्ट सिस्टम र पूर्ण डिजिटल डिस्प्ले जडान गरिएको छ । कारको एसी भेन्टको डिजाइन पनि परिवर्तन गरिएको छ ।

कारमा लेभल २ एडीएएस, प्यानोरामिक सनरुफ, इलेक्ट्रोनिक पार्किङ ब्रेक, ड्युअल जोन क्लाइमेट कन्ट्रोल एसी, अटो होल्ड, ८वे पावर एडजस्टेबल ड्राइभर सिट, भेन्टिलेटेड सिट, ३६० डिग्री क्यामेरा, नयाँ स्टेयरिङ ह्विल, मुड एडजस्टिङ लाइट, एम्बियन्ट लाइट, एन्ड्रोइड अटो र एप्पल कारप्ले, वायरलेस चार्जर, ट्रयाक्सन कन्ट्रोल, बोस साउन्ड सिस्टम, हेडअप डिस्प्ले, ६ एयरब्याग, एबीएस, ईबीडी, रियर पार्किङ सेन्सर, स्टेबिलिटी कन्ट्रोल, टायर प्रेसर मोनिटरिङ सिस्टम जस्ता फिचर रहेको छ । नेपाली बजारमा पनि यो गाडी केही महिना भित्रै आउने अनुमान गर्न सकिन्छ ।