बजार मूल्यमा हुन्डाइलाई उछिन्यो कियाले

कियाको बजार मूल्यले सन् २००१ पछि पहिलो पटक हुन्डाईलाई उछिनेको छ । स्टकमा निरन्तर बृद्धि भएसंगै किया मोटर्स दक्षिण कोरियाका पाँचौ सबैभन्दा मूल्यवान स्टक बनेको हो । कम्पनीको मार्केट भ्यालू ३१ बिलियन डलर पुगेको छ ।

कम लागतका ईभीहरु ल्याउने घोषण गरेसंगै कम्पनीको स्टकमा उच्च बृद्धि आउन थालेको एक रिपोर्टमा उल्लेख गरिएको छ । कम्पनीले निकट भविष्यमा कम मूल्यका मोडलहरु ईभी३ ईभी४ र ईभी ५ लन्च गर्ने उद्घोष गरेको थियो । यो वर्ष कियाको ईभी बिक्री ५० प्रतिशतले बढेर २ लाख ७० हजार यूनिट पुग्ने प्रक्षेपण गरिएको छ ।

सन् १९९८ मा टाट पल्टिने अबस्थामा पुगिसकेको कियालाई हुन्डाईले खरिद गरी यसको अस्तित्व बचाएको थियो । कियालाई खरिद गरेपछि सन् २००० मा हुण्डाई मोटर ग्रुप स्थापना भएको हो । ग्रुपमा हाल हुन्डाई र किया सहित लक्जरी ब्राण्ड जेनेसिस सामेल छ ।