नेपाल सुपर लिगमा धनगढी फुटबल क्लबसँग किया नेपालको साझेदारी

काठमाडौं – नेपाली फुटबलको क्षेत्रमा किया ब्रान्डको गाडी समेत जोडिएको छ । कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले धनगढी फुटबल क्लबसँग किया नेपालले साझेदारी गरेको बताएको छ ।

बैशाख ११ गते दशरथ रंगशालामा प्रारम्भ भएको राउन्ड रोबिन फम्र्याटमा खेलिने सुपर लिग नेपालमा पहिलो पटक आयोजना हुन लागेको फ्रेन्चाइज फुटबल टुर्नामेन्ट हो । यही क्रममा अन्तर्राष्ट्रिय खेल जगतमा जस्तै नेपालमा पनि किया फुटवलसँग जोडिएको छ ।

किया र धनगढी फुटबल क्लबको साझेदारीसँगै उक्त क्लबका खेलाडीहरुको जर्सीमा कियाको लोगो प्रयोग हुनेछ । त्यसैगरी, अनलाइन डिजिटल कन्टेन्ट र अन्य गतिविधिमार्फत पनि ब्रान्ड सचेतना जगाइने किया नेपालले बताएको छ । कियाले धनगढी फुटबल क्लब टिमको जर्सीसँगै आफ्नो नयाँ लोगो पनि देशव्यापी रुपमा सार्वजनिक गर्ने जनाएको छ ।

कियाले अस्ट्रेलियन ओपन, फिफा वर्ल्ड कपमा अफिसियल अटोमोटिभ पार्टनर, युरोपका ५४ मुलुक सहभागी हुने प्रतिस्पर्धा युईएफए युरोपा लिग, नेसनल मोटरस्पोर्ट्स जस्ता खेलहरुमा आबद्धता जनाउँदै आएको छ ।