किया ईभी९ को बिक्री सुरु हूँदै, यस्तो छ फिचर र पर्फमेन्स

काठमाडौं– कियाको फ्ल्यागशिप इलेक्ट्रिक एसयूभी ईभी९ भन्सार विन्दुमा आइपुगेको छ । भन्सार जाँचपास भएर सोरुममा आइसकेपछि यसको बिक्री सुरु हुने आधिकारिक वितरक कन्टिनेन्टल ट्रेडिङ स्रोतले बताएको छ । उक्त स्रोतका अनुसार पहिलो चरणमा १० वटा इभी९ नेपाल आएको हो । जसको मूल्य १ करोड ८० लाख हाराहारी तय हुने अनुमान गरिएको छ ।

हुन्डाई समुहको ई–जीएमपी प्लेटफर्मममा बनेको उक्त एसयुभी निकै नै मस्कुलर र स्पोर्टी रहेको छ । सो नयाँ एसयूभीको लम्बाई ५०१० एमएम, चौडाई १९८० र उचाई १७५५ एमएम छ भने ह्विलवेश ३१०० एमएम छ । इन्नोभेटिभ डिजाइन र हाईटेक इन्टेरियरमा सजिएको सो एसयुभीलाई फयुचरिष्टिक देखाउन डिजिटल टाइगर फेस सिग्नीचर, डिजिटल प्याट्रन लाइटिङ ग्रील र भर्टिकल हेडल्याम्प जस्ता एक्सटेरियर फिचर दिइएको छ ।

ईभी९ अन्तराष्ट्रिय बजारमा मा ९९.८ किलोवाट आवर र ७६.१ किलोवाट आवरको ब्याट्री अप्सनमा उपलब्ध रहँदै आएकोमा कुन साइजको ब्याट्री प्याक जडित मोडल नेपाल आएको हो भन्ने विषयमा स्पष्ट जानकारी आइसकेको छैन । रियर ह्विल र अल ह्विल दुबै ड्राइभ सिस्टमा उपलब्ध यसको रियर ह्विल ड्राइभ मोडल नेपाल आएको हो । यो नयाँ कारको रेन्ज ५४१ किलोमिटर दावी गरिएको छ ।

फराकिले पानारोमिक डिस्प्ले दिइएको यो एसयूभीमा १२.३ इन्चको इन्फोटेन्मेन्ट डिस्प्ले र सोही साइजकै अर्को इन्स्ट्रयुमेन्ट क्लस्टर डिस्प्ले तथा ५ इन्चको सेग्मेन्ट डिस्प्ले राखिएको छ । कारमा हिडन टाइप टच बटन, स्टार्ट स्टप फंक्सन, १० वटा एयर ब्याग र एडास अन्तर्गत थुप्रै सेफ्टि फिचर दिइएको छ ।