किया ईभी–९ बन्यो ‘वर्ल्ड कार अफ दि इयर–२०२४’

कियाको इलेक्ट्रिक कार ईभी–९ ले वर्ल्ड कार अफ दि इयर–२०२४ को अवार्ड पाएको छ । उक्त उपाधिका लागी विभिन्न ब्राण्डका ४६ वटा कार छनोट गरिएकोमा ईभी–९, बिवाइडी सील र भल्भो इएक्स–३० अन्तिम तीनमा परेका थिए ।

सर्ट लिष्टमा परेका बाँकी कारलाई पछि पार्दै अमेरिकामा जारी न्यूवर्क मोटर सोमा ईभी–९ लाई उक्त उपाधी दिइएको हो । कियाको उक्त कारले वर्ल्ड इलेक्ट्रिक कार अफ दि इयरको उपाधी समेत पाएको छ ।

एक वर्षअघि ग्लोबल डेब्यू गरिएको ईभी–९ ले यसअघि २०२४ उमन्स वर्ल्डवाइड कार अफ दि इयर अवार्ड समेत पाएको थियो । कारमा उपलब्ध इन्नोभेटिभ डिजाइन, फराकिले सेभेन–सीट इन्टेरियर र प्रतिस्पर्धी मूल्यका आधारमा ईभी–९ लाई उक्त उपाधी दिइएको आयोजकले जनाएको छ ।

यसैगरी, आयोनिक–५ एनले वर्ल्ड पर्फमेन्स कार अफ दि इयर र भल्भो इएक्स–३० ले वर्ल्ड अर्बान कार अफ दि इयर हात पारेका छन् । बीएमडब्लु आई–५ ले वर्ल्ड लक्जरी कार अफ दि इयर अवार्ड पाएको छ । विश्वका २९ देशका १०० जना प्रतिष्ठित अटोमोटिभ जर्नालिस्ट सम्मिलित निर्णायक मण्डलले अवार्डबारे फैसाला गरेका थिए ।