औपचारिक लन्च पहिले नै कियाको नयाँ इलेक्ट्रिक कार ईभी५ प्रदर्शन

काठमाडौं – कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले काठमाडौंको गैरीधारास्थित सिल्भर ओकमा एक्सचेन्ज क्याम्प सम्पन्न गरेको छ । सो अवसरमा कियाका अन्य मोडलका अतिरिक्त नेपालमै पहिलो पटक औपचारिक रुपमा नयाँ इलेक्ट्रिक कार ईभी५ समेत प्रदर्शन ग-यो ।

किया ईभी५ नेपाली बजारमा औपचारिक रुपमा लन्च भएको छैन । हाल सो ईभी परीक्षणका लागि मात्र ल्याइएको र ग्राहकको प्रतिक्रिया बुझ्नका लागि मात्र यसलाई प्रदर्शन गरिएको कम्पनी स्रोतको भनाइ छ । गत भदौ महिनामा सम्पन्न नाइमा मोबिलिटी एक्स्पोमा सो गाडी प्रदर्शन गर्ने तयारी भए पनि विविध कारणले नेपाल भित्रिन नसकेका कारण सम्भव भएको थिएन ।

किया ईभी५ अन्तर्राष्ट्रिय बजारमा पहिले नै लन्च भइसकेको भए पनि नेपालमा भने यो गाडी बिक्रीका लागि उपलब्ध हुने वा नहुने वारेमा समेत कुनै औपचारिक जानकारी सार्वजनिक गरिएको छैन ।

किया ईभी५ मा १६० किलोवाटको मोटर छ । यसमा ६४.२ किलोवाट आवरको बीवाईडीको ब्लेड ब्याट्री रहेको छ । यसले सिंगल चार्जमा ५३० किलोमिटरको रेन्ज दिन्छ ।

निकै नै आकर्षक र स्पोर्टी लुक्समा आएको ईभी५ मा ब्याट्रीको सुरक्षाका लागि डेडिकेटेड हिट पम्प सिस्टम दिइएको छ । जसले ब्याट्रीमा लाग्न सक्ने संभावित आगलागीको जोखिमबाट बचाउँन मद्दत गर्दछ ।

साथै यसमा यत्रा गर्दा आराम महसुस हुनेगरी इन्टेरियरमा पर्याप्त स्पेस दिइएको छ । सो नयाँ ईभीमा डयुअल स्क्रिन, फोर स्पोक स्टेयरिङ ह्विल र गियर लिभर समेत पाउन सकिन्छ ।

सुरक्षाका लागि यसमा एडीएएस फिचर सामेल गरिएको छ । अन्य सेफ्टी फिचरमा ७ वटा एयरब्याग, एल२ प्लस लेभल एसिस्टेड ड्राइभिङ, रिमोट कन्ट्रोल स्मार्ट पार्किङ र सेमी अटोमेटिक लेन चेन्जिङ लगायत दिइएको छ ।

यो गाडीको मूल्य १ करोड रुपैयाँ भन्दा बढी नै पर्ने अनुमान गर्न सकिन्छ । यद्यपि फिचर र मूल्य लगायत अन्य कुनै पनि जानकारी सार्वजनिक भएको छैन ।