बुलेटसँग प्रतिस्पर्धा गर्न ४०० सीसी सेगमेन्टमा कावासाकी इलिमिनेटर आउँदै

स्पोर्ट्स बाइक निर्माता कम्पनी कावासाकीले छिट्टै भारतमा रोयल इन्फिल्डसँग प्रतिस्पर्धा गर्न नयाँ बाइक लन्च गर्ने भएको छ । यो बाइक २०२३ कावासाकी इलिमिनेटर ४०० हुनेछ ।

यो क्रुजर बाइक सन् २०२३ को दोस्रो हप्ता भारतमा लन्च हुने अपेक्षा गरिएको छ । लन्चिङ पछि सो बाइकले रोयल इन्फिल्डको सुपर मेटियर ६५० सँग प्रतिस्पर्धा गर्नेछ ।

यसमा ३९८ सीसीको प्यारेलर ट्विन, लिक्विड–कुल्ड इन्जिन छ, जुन ६ स्पिड गियरबक्ससँग जोडिएको छ । सो इन्जिनले १०,००० आरपीएममा ४६.९ बीएचपीको पावर र ८,००० आरपीएममा ३७ एनएमको टर्क जेनेरेट गर्छ ।

सो बाइकमा १८ इन्च फ्रन्ट र १६ इन्च रियर ह्विल छ । यसको तौल १७६ केजी छ । ब्रेकिङको लागि ३१० एमएम डिस्क र रियरमा २४० एमएम ड्रम ब्रेक रहेको छ । यसमा ड्युअल च्यानल एबीएस पनि छ ।

कावासाकी इलिमिनेटर ४०० को डिजाइन क्लासिक क्रुजरको जस्तै छ । बाइकमा टियरड्रप आकारको इन्धन ट्याङ्की, चौडा ह्यान्डलबार र क्रोम एक्जस्ट सिस्टम पनि छ । यो बाइक जापानी बजारमा स्ट्यान्डर्ड र एसई गरी २ भेरिएन्टमा उपलब्ध छ ।