आगामी माघ ३ गते काठमाडौं रोड सेफ्टी फिल्म फेस्टिभल आयोजना गरिने

काठमाडौं – आगामी २०७९ माघ ३ गते अर्थात सन् २०२३ जनवरी १६ तारिखका दिन ‘काठमाडौं रोड सेफ्टी फिल्म फेस्टिभल’ आयोजना हुने भएको छ । यो भन्दा पहिले दुई पटक भइसकेको फिल्म फेस्टिभलको यो तेस्रो संस्करण हो ।

ग्लोबल एलायन्स अफ एनजिओज फर रोड सेफ्टी, एफआईए फाउन्डेसन र अन्य विभिन्न संस्थाहरुको सहयोगमा नासा फाउन्डेसनले नेपालमा आयोजना गर्ने सो फिल्म फेस्टिभल मार्फत सडक र सवारी सम्बन्धी आधारभुत जानकारी दर्शक सामु प्रस्तुत गर्ने लक्ष्य रहेको बताइएको छ । ‘मोटरसाइक्लिङ्ख सेफ्टी’ मुख्य थिम रहेको सो फिल्म फेस्टिभल इन्टरनेसनल रोड सेफ्टी फिल्म फेस्टिभलमा आवद्घ रहेको छ ।

फिल्म फेस्टिभलमा विभिन्न प्रतियोगीहरुले सडक सुरक्षा, सेफ्टी राइडिङ र हेल्मेट तथा भयरहित यात्राको अधिकार सम्बन्धी फिल्म प्रदर्शन गर्नेछन् । प्रतियोगीले बढीमा १० मिनेटको फिल्म देखाउन सक्ने छन्, जस अन्तर्गत डिसेम्बर ३० भित्र आ–आफ्नो फिल्मको अवधारणा (Concept) वुझाइसक्नु पर्नेछ भने छनोटमा परेका १० देखि १५ वटा अवधारणालाई प्रक्रियामा सामेल गराइनेछ । विभिन्न छलफल, ओरिएन्टेसन (Orientation) र निर्माणको चरण पार गरेका १० वटा फिल्मलाई प्रतिस्र्धामा समावेश गरिनेछ ।

अन्तिम दिनमा दरवारमल स्थित दरवार सिनेम्याक्समा फिल्म प्रदर्शन गरिने छ । उतm फिल्म फेस्टिभलमा यातायातका सरकारी निकाय, ट्राफिक प्रहरी, स्वास्थ्य र सुरक्षा सम्बन्धी निकायहरु, अटोमोबाइल सम्बन्धी व्यावसायिक प्रतिष्ठानहरु, स्थानीय निकाय, सरकारी, गैरसरकारी संस्था, राष्ट्रिय अन्तर्राष्ट्रिय संघ संस्था तथा व्यावसायिक संस्थाको समेत सहयोग रहनेछ ।

सो अवसरमा फिल्म प्रदर्शनसँगै अवार्ड प्रोग्राम, अन्तरक्रिया तथा सडक र सुरक्षा सम्बन्धी विभिन्न विषयमा प्रदर्शनी समेत गरिने छ ।

सन् २०१८ बाट नासा नेपालले सडक सुरक्षाको क्षेत्रमा काठमाडौं रोड सेफ्टी फिल्म फेस्टिभल शुरु गरेको थियो भने २०२० मा दोश्रो फिल्म फेस्टिभल आयोजना गरेको थियो ।

कुल १२ लाख ५० हजार अनुमानित खर्च लाग्ने सो फिल्म फेस्टिभलको लागि ईश्वर बल्लभ उप्रेतीको संयोजकत्वमा एक समिति गठन गरिएको नासा नेपालले जनाएको छ ।

नासा फाउण्डेसन, नेपाल अटोमोबाइल्स एसोसिएसन (नासा नेपाल) को सडक सुरक्षा, मोबिलिटी र कल्याणकारी कार्यको लागि स्थापित संस्था हो ।