नाडा अध्यक्षमा उम्मेदवारी दिने करण चौधरीको घोषणा : भन्छन् – नाडालाई चिनाउनु पहिलो एजेन्डा

काठमाडौं – अटोमोबाइल व्यवसायीहरुको छाता संगठन नाडा अटोमोबाइल्स एसोसिएसनको अध्यक्ष पदका लागि हालका उपाध्यक्ष करण चौधरीले उम्मेदवारी दिने घोषणा गरेका छन् । केन्द्रबिन्दु टीभीसँगको कुराकानीमा चौधरीले सो घोषणा गरेका हुन् ।

कृष्णप्रसाद दुलालको अध्यक्षतामा रहेको हालको कार्यसमितिमा उपाध्यक्ष रहेका चौधरी सीजी होल्डिङ्सका कार्यकारी निर्देशक हुन् । सीजी होल्डिङ्स अन्तर्गतको सीजी मोटोकर्पले नेपाली बजारमा सुजुकी गाडी बिक्री–वितरण गरिरहेको छ ।

हालको कार्यसमितिले कोभिड–१९ को कारण चाहे जति कार्य गर्न सकेको छैन । पहिलो वर्ष उत्साहपूर्ण कार्य गरेको, सबैसँग भेटघाट गरेर काम गर्ने लहर चलेको समयमा कोभिड–१९ ले असर गरेको थियो । यद्यपि पछिल्लो समयमा सरकारले समेत नाडालाई पहिचान गर्न थालेको र कुनै पनि निर्णय गर्दा नाडाको सल्लाहलाई मानेर अगाडि बढौं भन्ने अवस्था आएको उनले बताए ।

आफूले अध्यक्षको उम्मेदवारको रुपमा अगाडि बढ्ने योजना साथीहरुलाई बताइसकेको र यसका लागि सर्वसम्मत रुपमा अगाडि बढ्न प्रयास गर्ने बताए । नेपाल जस्तो सानो देशमा अध्यक्ष पदका लागि साथीहरुकै बीचमा मनमुटाव हुनुहुदैन भन्ने उनको मान्यता छ । उनी भन्छन्, ‘सबैको विश्वास जित्न सके र मलाई लिडरको रुपमा मान्नु भयो भने पक्का पनि सर्वसम्मत हुनेछ ।’

कुनै पनि कार्य गर्दा तयारी गरेर मात्र अगाडि बढ्ने आफ्नो ‘नेचर’ भएको र नेचर अनुसार नै अध्यक्ष पदमा उम्मेदवारी दिनका लागि आफूलाई तयारी अवस्थामा राखेको उनले बताए ।

आफू अध्यक्ष भइसके पछि नाडालाई चिनाउनु आफ्नो पहिलो एजेन्डा भएको उनले बताए । यसका लागि सबै साथीहरुका साथ सहकार्य गरी नाडालाई सबैको बीचमा परिचित गराउने र अटोमोबाइल व्यवसायीको हितमा काम गर्ने उनले बताए ।

नयाँ कार्यसमितिको लागि अब तयारी शुरु हुन थालेको छ । हालको कठिन अवस्थामा स्वास्थ्य सम्बन्धी मापदण्डका कारण केही असहज अवस्था हुने भएकाले त्यसै अनुसार अगाडि बढ्नु पर्ने अवस्था छ । ढिलोमा पनि आगामी पुस महिना सम्म नाडाको अधिवेशन गर्नुपर्ने अवस्था छ ।