ईभी बजारमा चाइनिज एयरलाइनको प्रवेश, चीनमा डेब्यु गर्नु अघि थाइल्यान्डमा लन्च ग-यो पहिलो ईभी

चाइनिज एयरलाइन जुनयाओ एयरलाइनले चाइनिज घरेलु बजारमा डेब्यु गर्नु अघि थाइल्यान्डमा आफ्नो पहिलो ईभी जेवाई एयर इलेक्ट्रिक सेडान लन्च गरेको छ । ८ वर्षको वारेन्टी, ५२० किलोमिटर सम्मको रेन्ज र करिव २५ हजार २ सय डलर मूल्य सहित सो इलेक्ट्रिक सेडान सार्वजनिक भएको हो ।

सन् २००५ मा स्थापना भएको जुनयाओ एयरलाइन चीनको प्रमुख डोमेस्टिक अपरेटर मध्ये एक हो । उक्त एयरलाइनले युरोप, एसिया र अष्ट्रेलियन रिजन लगायतका विभिन्न स्थानमा अन्तर्राष्ट्रिय उडान समेत गर्दै आएको छ ।

सन् २०२३ मा जुनयाओ अटोमोबाइल ब्रान्च स्थापना गरेर अटोमोटिभ सेगमेन्टमा प्रवेश गरेको सो एयरलाइनले वित्तीय रुपमा समस्यामा परेको युडो स्टार्टअपलाई एक्वायर गरेको थियो । सन् २०१८ मा स्थापना भएर २०२२ सम्मको अवधिमा युडोले वार्षिक रुपमा करिव १ लाख युनिट कार उत्पादन गर्ने प्लान्ट स्थापना गरे पनि यो अवधिमा २० हजार कार मात्र बिक्री गरेको थिया । त्यसपछि कार उत्पादन बन्द गरिएको थियो ।

जुनयाओ एयर अर्थात जेवाई एयर सेडान हाल थाइल्यान्ड मोटर एक्सपो २०२४ मा सार्वजनिक गरिएको हो । एरोडाइनामिक आकारमा रहेको सो कम्प्याक्ट सेडानमा स्लिक रुफलाइन, रिट्राक्टेबल डोर ह्यान्डल र फरक खालको एलईडी हेडलाइट लगायतका फिचर रहेका छन् । यसको लम्बाई, चौडाई र उचाई क्रमशः ४५५०, १८६० र १५१५ एमएम छ भने ह्विलबेस २८०० एमएम छ ।

जेवाई एयरको क्याबिनमा क्वालकम स्न्यापड्रागन ८१५५ चिप सहितको ठुलो मुख्य स्क्रिन छ । यसमा थ्रीडी ककपिट सहितको क्रिस्टल ओएस छ, जसले एलटु प्लस ड्राइभिङ असिस्ट सिस्टम सपोर्ट गर्छ । त्यसैगरी यसमा टु स्पोक स्टेयरिङ ह्विल, एक जोडी वायरलेस चार्जिङ प्याड, ठुलो सनरुफ र पाँच जना बस्न मिल्ने सुविधा छ ।

सो गाडीमा १५० किलोवाटको मोटर र २५० एनएमको रियर एक्सल छ । यसले १०० किलोमिटर प्रतिघण्टा सम्मको गति ७.९ सेकेन्डमा लिन सक्छ भने टप स्पिड १७० किलोमिटर प्रतिघण्टा छ ।

विश्वकै सबैभन्दा ठूलो ब्याट्री निर्माता कम्पनी सीएटीएलको सेन्जिङ एलएफपी ब्याट्री उपलब्ध हुने सो गाडीमा ५१ र ६४ किलोवाट आवर अप्सनमा ब्याट्री उपलब्ध हुनेछ, जसले सिंगल चार्जमा क्रमशः एनईडीसी अनुसार ४३० र ५२० किलोमिटर रेन्ज दिन्छ ।

जेवाई एयरले सन् २०२५ सम्म लोकल एसेम्बली बनाउने लक्ष्य राखेको छ । यद्यपि बीवाईडी एट्टो ३ लगायतका गाडीसँग यसको प्रतिस्पर्धा हुनेछ ।

नेपाली बजारमा पनि भविष्यमा यो गाडी आउने निश्चित छ । नेपाली बजारमा चीनमा बनेका विभिन्न ईभी भित्रिरहेको समयमा चाइनिज एयरलाइन बजारमा राम्रो पर्फमेन्स गरिरहेको कम्पनीको उत्पादन भित्रिने कुरामा समेत विश्वस्त हुन सकिन्छ ।