एमजी मोटर इन्डियमा लगानी थप्दै जेएसडब्लु समुह, अर्को वर्ष कमर्सियल ईभी ल्याउने

जेएसडब्लु समूहले एमजी मोटर इन्डियामा आफ्नो हिस्सेदारी बढाउने भएको छ । साझेदार कम्पनि एसएआईसी मोटरले आफ्नो भारत सञ्चालनमा थप पूँजी लगानी नगर्ने निर्णय गरेपछि जेएसडब्लुले लगानी थपेर हिस्सा बढाउने निर्णय लिएको हो ।

जेएसडब्लु एमजीमा हाल जेएसडब्लु समुहको ३५ प्रतिशत लगानी छ भने ४९ प्रतिशत एसएआईसी मोटर र बाँकी १६ प्रतिशत भारतका विभिन्न वित्तिय संस्था, कर्मचारी र डिलरहरुले लगानी गरेका छन् ।

’एसएआईसीले अहिले भारतमा लगानी गर्ने प्रतिबद्धता गरेको छैन । उनीहरुको ध्यान चीन र यूरोपमा केन्द्रित रहेकाले भारतमा लगानी गर्न हामी नै अघि सर्नुपर्ने अवस्था छ । हामीले लगानी गर्न इच्छुक छौं भन्दै हात उठाएका छौं र उनीहरूको हिस्सेदारी घट्नेछ’ जेएसडब्लु समुहका निर्देशक पथ जिन्दलले भने ।

लगानी पछि जेएसडब्लु सबैभन्दा ठूलो शेयर होल्डर बन्ने बताइएपनि कति प्रतिशत हिस्सा आगट्छ भन्ने विषयमा कुनै जानकारी बाहिर आइसकेको छैन ।

जेएसडब्लुले भारतीय बजारमा आफ्नै ईभी मोडल लन्च गर्ने योजना बनाइरहेको छ । कम्पनीले अर्को वर्ष नै लन्च गर्नेगरी कमर्सियल ईभी समेत विकास गरिरहेको छ ।