जीप एभेन्जर पेट्रोल भेरियन्टमा पनि बन्दै, आउला त नेपाल ?

जीप एभेन्जर इलेक्ट्रिकमा मात्र नभई पेट्रोल माइल्ड हाईब्रिड र पेट्रोल भेरियन्टमा पनि आउने भएको छ ।

युरोपेली बजारमा १५६ एचपीको इलेक्ट्रिक क्रसओभरका रुपमा विक्री भइरहेको एभेन्जर १०० एचपीको माइल्ड हाइब्रिड सेटअप भएको ई–हाइब्रिड पावर ट्रेनमा पनि उपलब्ध हुने जीपले जनाएको छ । जीपका अनुसार यसमा २१ किलोवाट क्षमताको इलेक्ट्रिक मोटर र ४८ भोल्टको एक्स्ट्रा माइल्ड हाइब्रिड असिस्टेन्स सहितको १.२ लिटरको पेट्रोल इन्जिन जडान गरिएको हुनेछ ।

यो नयाँ भेरियन्टको ई–हाइब्रिड क्रसओभर इलेक्ट्रिक पावरबाट मात्र १८ माइल प्रतिघन्टाको रफ्तारमा चल्नेछ । हेभि ट्राफिक भएको स्थानमा जिपको ई–क्रिपिंग फंक्सन चल्नेछ, जसले एसिलेरेटर इनपुटविना नै गाडीलाई अगाडि बढाउनेछ । फुल्ली इलेक्ट्रिक मोडेलमा झैं ई–हाइब्रिड मोडेलमा अटोमेटिक गियरबक्स हुनेछ । यसले ११ सेकेन्डमा ० देखि ६२ माइल प्रतिघन्टाको रफ्तार लिन सक्नेछ ।

ई–हाइब्रिड एभेन्जरमा ओपन एअर पानोरामिक सनरुफ र मसाज फंक्सनसहित इलेक्ट्रोनिकल्ली पावर्ड ड्राइभर सिटजस्ता केही नयाँ फिचर हुनेछन् । ड्यासबोर्डमा १० इन्चको डिजिटल इन्स्ट्रयुमेन्ट क्लस्टर हुनेछ, जसले ड्राइभ मोड, इन्जिन स्टेटस, फिडब्याक पावर, मिटर रिडिंग जस्ता ई–हाइब्रिड सूचनाहरु दिनेछ ।

सुरुमा बेलायतमा उपलब्ध हुने यो मोडेल १.२ लिटरको टर्बो पेट्रोल इन्जिनमा उपलब्ध हुनेछ । १०० एचपी पावर उत्पन्न गर्न सक्ने यो मोडलमा जिपको नेभिगेसन सफ्टवेयर, रिभर्स क्यामेरा, १८ इन्चको एलोई ह्विल, हिटेड सिट र ब्ल्याइन्ड स्पट मनिटरिंग लगायत फिचर उपलब्ध हुनेछ ।

डिसेम्बरमा विक्री हुने एभेन्जर ई–हाइब्रिड नेपालमा आउनेबारे जीपको आधिकारिक विक्रेता एमएडब्लु लाइफले केही खुलाएको छैन । आकर्षक स्टायल, कम्पिटिटिभ ब्याट्री रेन्ज र अफरोड क्यापाबिलिटीका कारण बेलायतलगायत युरोपमा राम्रो प्रतिक्रिया पाएको एभेन्जर भारतबाट पनि उत्पादन हुनेछ । तर यसको यकिन मिति भने जिपले औपचारिक रुपमा घोषणा गरिसकेको छैन ।