पेट्रोलमा इथानोल मिसाउन पाइने, के हो इथानोल ?

नेपाल आयल निगमले पेट्रोलमा १० प्रतिशत इथानोल मिसाउन पाउने भएको छ । सोमबार बसेको मन्त्रिपरिषदको बैठकले पेट्रोलमा इथानोल मिश्रण गरी प्रयोगमा ल्याउनेसम्बन्धी आदेश २०८२ स्वीकृत गर्ने निर्णय गरेको हो ।

उखु उद्योगीहरुको लामो प्रयासपछि अन्ततः सरकारले पेट्रोलमा इथानोल मिश्रण गरी प्रयोगमा ल्याउने आदेश स्वीकृत गरेको हो । इथानोल मिसाउने योजना निगमले पहिलेदेखि बनाएको भए पनि अनुमति पाएको थिएन । अब मन्त्रिपरिषदबाट स्वीकृत कार्यविधि पाएपछि इथानोल माग गरिने निगमले जनाएको छ ।

हाल नेपालमा चिनी उद्योगीहरूले इथानोल उत्पादन गरिरहेका छन् । उनीहरूले मोलासिस (खुदो)लाई प्रशोधन गरेर इथानोल बनाउँछन । उक्त इथानोल हाल बंगलादेश निर्यात हूँदै आएको छ ।

इथानोलले सवारी साधनको इन्जिनबाट हुने उत्सर्जन कम गराएर प्रदूषण घटाउँछ । यो उखु, पराल, सुकेका घाँसलगायतका वस्तुबाट उत्पादन गर्न सकिन्छ । नेपालमा भारतबाट पेट्रोल आयात गर्नुपर्ने भएकाले विदेशी मुद्राको समेत बचत हुन्छ ।

भारत, ब्राजिल लगायतका देशले पेट्रोलमा १० देखि २५ प्रतिशतसम्म इथानोल मिसाइरहेको भएपनि नेपालमा २ प्रतिशतसम्म व्यवाहरिक बन्ने देखिन्छ । पेट्रोलमा मिसाउन ९९.५ प्रतिशत शुद्धता भएको इथानाले आवश्यक पर्छ ।

नेपालमा दैनिक करिब ४० लाख लिटर पेट्रोल खपत हुन्छ । पेट्रोलमा १० प्रतिशत इथानोल मिश्रण गर्न सकिन्छ । यसरी हेर्दा एक वर्षमा १४ करोड ४० लाख लिटर पेट्रोलको आयात कम गर्न सकिन्छ ।