नाडा अध्यक्ष उम्मेदवार करण चौधरीको प्यानलका साथ पोखराका व्यवसायीको अन्तरक्रिया

पोखरा – नाडा अटोमोबाइल्स एसोसिएसन अफ नेपालको साधारण सभा र अधिवेशन नजिकिएसँगै नेतृत्वका आकांक्षीहरु अहिले देश दौडाहामा सक्रिय छन् । केही समय अघिमात्र अध्यक्षका उम्मेदवार धुब्र थापाले आफ्नो प्यानलमा सामेल व्यवसायीको समुह नै लिएर पूर्वका विभिन्न शहरहरुमा अन्तरक्रिया कार्यक्रम सम्पन्न गरेका थिए । अध्यक्षका अर्का उम्मेदवार करण चौधरीले थापा पुग्नुभन्दा अगावै पूर्वका यी शहरहरुमा कार्यक्रम सम्पन्न गरिसकेका भए पनि उनी पोखराका व्यवसायीमाझ भने पुग्न सकिरहेका थिएनन् ।

यसैमाझ चौधरीले हिजो पोखरामा एक कार्यक्रमको आयोजना गरी व्यवसायीसँग अन्तरक्रिया कार्यक्रम सम्पन्न गरेका छन् । उनी नाडामा हालका अध्यक्ष कृष्णप्रसाद दुलाल र अन्य पदाधिकारी तथा कार्यसमिति सदस्यसहित पोखरा पुगेका हुन् । चौधरीलाई हाल नाडामा पदाधिकारी रहेका अधिकांश व्यवसायीले साथ दिएका छन् भने कार्यसमितिमा सदस्य रहेका बहुसंख्यक व्यवसायी समेत उनको पक्षमा खुलेका छन् ।

उता पोखराबाट व्यवसाय शुरुवात गरेका थापा पश्चिमाञ्चल अटोमोबाइल डिलर्स एसोसिएसनमा यसअघि अध्यक्ष भैसकेका कारण उक्त संस्थाको हालको नेतृत्व र अधिकांश व्यवसायी उनको पक्षमा खुलेर लागिपरेका छन् । साथै काठमाडौंका केही ठूला कर्पोरेट हाउस र जिल्ला बाहिरका संघसंस्थाले समेत थापालाई साथ दिने देखिएको छ ।

नाडाले यही मंसिर २२ र २३ गने काठमाडौंमा साधरणसभा आयोजना गर्न गैरहेको छ । साधरणसभासँगै आयोजना गरिने अधिवेशनले नयाँ नेतृत्व चयन गर्ने हुँदा अहिले अटोमोबाइल व्यवसायीमाझ चुनावी सरगर्मी बढेको छ । विगतका अधिकांश नेतृत्व सर्वसम्मत चयन हुँदै आइरहेकोमा पछिल्लो केही वर्षयता यो निकै प्रतिस्पर्धात्मक बन्दै गएको छ । नेतृत्वमा यसपाली पोखराबाट व्यवसाय शुरुवात गरेका धुब्र थापा र चौधरी ग्रुपका करण चौधरीबीच प्रतिस्पर्धा हुँदैछ ।