पाकिस्तानमा गोप्य रूपमा निर्यात गरिन्छ भारतमा निर्मित रोयल इन्फिल्ड बाइक, तर दोब्बर मूल्यमा

भारतमा बनेका रोयल इन्फिल्ड बाइकहरू पाकिस्तानमा गोप्य रूपमा विक्री भइरहेका छन्। शक्तिशाली इन्जिन, उत्कृष्ट निर्माण गुणस्तर र प्रभावशाली सडक उपस्थितिका कारण यी बाइकहरू भारतमा मात्र होइन, पाकिस्तानमा पनि अत्यन्तै लोकप्रिय छन्। यद्यपि, भारत र पाकिस्तानबीचको तनावपूर्ण सम्बन्धले गर्दा कुनै पनि भारतीय कम्पनीले पाकिस्तानमा सिधै बाइक बेच्न पाएको छैन।

रोयल इन्फिल्डले पाकिस्तानमा आधिकारिक रूपमा बाइक बिक्री नगर्ने जानकारी स्पष्ट रुपमा गराएकाे छ । भारत र पाकिस्तानबीच व्यापारिक सम्बन्ध लामो समयदेखि बन्द भएकाले पाकिस्तानमा रोयल इन्फिल्डका न त आधिकारिक शोरूम छन्, न त सर्भिस सेन्टर नै ।

भारतमा निर्मित बाइकहरू सिधै पाकिस्तान लैजान सकिँदैनन्, त्यसैले तिनलाई युएई, बंगलादेश वा अन्य तेस्रो मुलुकमार्फत पाकिस्तानमा ल्याइन्छ। यस्तो प्रक्रियामा धेरै भन्सार शुल्क, कर र कस्टम क्लियरेन्स शुल्क तिर्नुपर्छ। यसरी गर्दा बाइकको मूल्य यसको मूल मूल्यभन्दा दोब्बर पुग्छ।

पाकिस्तानमा यी बाइकहरू प्रायः ओएलएक्स, फेसबुक मार्केटप्लेस र विभिन्न बाइक कस्टमाइजेसन वर्कशपमार्फत बेचिन्छन्। प्रत्येक वर्ष सयौं रोयल इन्फिल्ड बाइक निजी रूपमा आयात गरिन्छ, जसमा क्लासिक ३५०, बुलेट ३५० र इन्टरसेप्टर ६५० जस्ता मोडलकाे सबैभन्दा बढी माग छ ।

उदाहरणका लागि, क्लासिक ३५० को मूल्य भारतमा करिब ७ लाख पाकिस्तानी रुपैयाँ बराबर पर्छ, तर पाकिस्तानमा आइपुग्दा यसको मूल्य १४ लाख देखि १५ लाख रुपैयाँसम्म पुग्छ। धेरै ढुवानी लागत, भन्सार शुल्क र करले बाइकको मूल्य अत्यधिक बढाउँछ। यसरी, पाकिस्तान सरकारले पनि यी मेड-इन-इन्डिया बाइकबाट ठुलो राजस्व आर्जन गरिरहेको छ, बिना आधिकारिक बिक्री नै।