आईएमई मोटर्सका सीईओ हेमन्त पुराणिकले पाए भारतको प्रतिष्ठित इन्डियन अचिभर्स अवार्ड

काठमाडौं – आईएमई मोटर्सका सीईओ हेमन्त पुराणिकले भारतको प्रतिष्ठित ‘इन्डियन अचिभर्स अवार्ड्स’ पाएका छन् । विश्वका विभिन्न स्थानमा रहेर विभिन्न ब्रान्डको प्रवद्र्धनमा सहयोग गर्ने प्रतिष्ठित व्यक्तित्वलाई प्रदान गरिने सो अवार्ड इन्डियन अचिभर्स फोरमले प्रदान गरेको हो ।

एउटै क्षेत्रमा २० वर्ष भन्दा लामो समय काम गरेर ब्रान्ड प्रवद्र्धन कार्यमा उल्लेखनिय सफलता प्राप्त गरेका व्यक्तिलाई सो अवार्ड प्रदान गरिन्छ । पुराणिकले अटोमोबाइल क्षेत्रमा रहेर २५ वर्ष भन्दा बढी कार्य गरिसकेका छन् । उनी हाल आईएमईको अटोमोबाइल डिभिजन आईएमई मोटर्सका ग्रुप सीईओ छन् ।

सन् १९९७ मा टाटा मोटर्सबाट आफ्नो व्यावसायिक यात्रा शुरु गरेका पुराणिकले सो ब्रान्डमा २२ वर्ष भन्दा बढी समय कार्यरत रहे । उनले नेपालका साथै बंगलादेश, भुटान, दक्षिण अफ्रिका, बोलिभिया र उरुग्वेमा रहेर सफलताका साथ ब्रान्डलाई माथि उठाउन भूमिका खेलेका थिए । सो समयमा पनि उनले विभिन्न प्रतिष्ठित अवार्ड प्राप्त गरेका थिए ।

त्यसपछि एक वर्ष दीगो ब्रान्डमा रहेर विद्युतीय सवारीको प्रवद्र्धनमा लागेका पुराणिक विगत करिव तीन वर्ष देखि आईएमई मोटर्समा कार्यरत छन् । अशोक लेल्यान्ड, एस्कर्ट्स, भर्ट इक्विपमेन्ट, हुन्डाई हेभी इक्विपमेन्ट र राफ्ट मोटर्सको कारोबार गरिरहेको आईएमई मोटर्स चुनौतीपूर्ण अवस्थामा रहेको समयमा उनको पदार्पण भएको थियो ।

उनी आईएमई मोटर्समा आए पश्चात नेपालमा अशोक लेल्यान्डको बजार हिस्सा ९ बाट २८ प्रतिशत र एस्कर्ट्सको बजार हिस्सा ८ बाट २१ प्रतिशत पुगेको छ । पहिले आफ्नो सेगमेन्टमा यी दुई ब्रान्ड क्रमशः चौथो र तेस्रो नम्बरमा रहेको अवस्थामा हाल दुवै दोस्रो नम्बरमा रहेको कम्पनीको भनाइ छ ।

पुराणिकले २५ वर्षको अवधिमा विश्वका विभिन्न तीन महादेशका ११ देशमा भारतीय ब्रान्ड अशोक लेल्यान्ड, एस्कर्ट्स, टाटा मोटर्स, भर्ट इक्विपमेन्ट र राफ्ट मोटर्सको प्रवद्र्धनमा महत्वपूर्ण भूमिका खेलेको इन्डियन अचिभर्स फोरमले बताएको छ ।

पुराणिकले प्राप्त गरेको सो अवार्डको वारेमा विस्तृत विवरण यहाँ हेर्न सकिन्छ ।